ന്യൂഡൽഹി: മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരെ പ്രതിഷേധിച്ച സ്ത്രീകളെ ഡൽഹി പോലീസിനൊപ്പം ആർഎസ്എസ് പ്രവർത്തകരും മർദിച്ചെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി. യുവാക്കളെ മർദിക്കാൻ പോലീസ് മുന്നിട്ടിറങ്ങുമ്പോൾ ആർഎസ്എസ് പ്രവർത്തകർക്ക് സ്വതന്ത്രമായി പ്രവർത്തിക്കാൻ അവസരം നൽകുകയാണെന്നും അദ്ദേഹം ആരോപിച്ചു. പ്രതിഷേധത്തിനിടെയുണ്ടായ മർദനത്തിന്റെ ദൃശ്യങ്ങൾ പുറത്തുവിട്ടുകൊണ്ടായിരുന്നു രാഹുലിന്റെ വാർത്താസമ്മേളനം.

ഗ്യാനേഷ് കുമാറിനെ സംരക്ഷിക്കുന്നത് എന്തിനാണെന്നും പ്രതിഷേധിക്കുന്ന യുവാക്കളെ മർദിക്കുന്നത് എന്തിനാണെന്നും പോലീസുകാർ പോലും ചോദിക്കുന്നുണ്ടെന്ന് രാഹുൽ ഗാന്ധി പറഞ്ഞു. പോലീസിലെ 50 ശതമാനം പേരും തങ്ങൾ ചെയ്യുന്നത് ശരിയാണെന്ന് സമ്മതിച്ചതായും അദ്ദേഹം അവകാശപ്പെട്ടു. പോലീസ്, ഐടിബിപി, സിആർപിഎഫ്, പ്രതിപക്ഷ പാർട്ടികൾ, രാജ്യത്തെ ജനങ്ങൾ എന്നിവരെ ഒരു വശത്തും പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, ദേശീയ സുരക്ഷാ ഉപദേഷ്ടാവ് അജിത് ഡോവൽ, ഗ്യാനേഷ് കുമാർ, തിരഞ്ഞെടുപ്പ് കമ്മിഷനിലെ ഏതാനും ഉദ്യോഗസ്ഥർ എന്നിവരെ മറുവശത്തും നിർത്തിയായിരുന്നു രാഹുലിന്റെ പരാമർശം.

ഗ്യാനേഷ് കുമാറിനെതിരെ കടുത്ത മുന്നറിയിപ്പും രാഹുൽ ഗാന്ധി നൽകി. അദ്ദേഹത്തിന്റെ ഭൂതകാലത്തെക്കുറിച്ചും അഴിമതിയുമായി ബന്ധപ്പെട്ട വിവരങ്ങളെക്കുറിച്ചും തങ്ങൾക്ക് അറിയാമെന്നും എല്ലാം പുറത്തുകൊണ്ടുവരാൻ കാത്തിരിക്കുകയാണെന്നും രാഹുൽ പറഞ്ഞു. ഗ്യാനേഷ് കുമാറിന് മുകളിലുള്ളവരിലേക്ക് എത്തണമെങ്കിൽ ആദ്യം അദ്ദേഹത്തെ സ്ഥാനത്തുനിന്ന് നീക്കണമെന്നും അദ്ദേഹം കൂട്ടിച്ചേർത്തു.

സുപ്രീം കോടതിയിൽ ഹർജി നൽകുമെന്ന് രാഹുൽ

മുഖ്യ തിരഞ്ഞെടുപ്പ് കമ്മിഷണർക്കെതിരായ പ്രതിഷേധവുമായി ബന്ധപ്പെട്ട വിഷയത്തിൽ സുപ്രീം കോടതി ചീഫ് ജസ്റ്റിസിനെ കാണാൻ അനുമതി ലഭിച്ചില്ലെന്നും രാഹുൽ ഗാന്ധി പറഞ്ഞു. ഇന്ത്യൻ ജനാധിപത്യവും നീതിപൂർവമായ തിരഞ്ഞെടുപ്പ് സംവിധാനവും നേരിടുന്ന വെല്ലുവിളികൾ ചൂണ്ടിക്കാട്ടി കോൺഗ്രസ് അധ്യക്ഷനും താനും ചീഫ് ജസ്റ്റിസിന് കത്തയച്ചിരുന്നു. എന്നാൽ പ്രതിപക്ഷ നേതാക്കളുമായി കൂടിക്കാഴ്ച നടത്താനാകില്ലെന്നും പ്രശ്നങ്ങൾ ഹർജിയായി കോടതിയിൽ ഉന്നയിക്കാമെന്നുമാണ് മറുപടി ലഭിച്ചതെന്ന് അദ്ദേഹം വ്യക്തമാക്കി.

ഇന്ത്യ സഖ്യത്തിലെ നേതാക്കൾക്കൊപ്പം സുപ്രീം കോടതിയിൽ ഹർജി സമർപ്പിക്കുമെന്നും രാഹുൽ അറിയിച്ചു. തിരഞ്ഞെടുപ്പ് പ്രക്രിയയിലെ സുതാര്യതയും ജനാധിപത്യത്തിന്റെ സംരക്ഷണവും ഉറപ്പാക്കുകയാണ് ലക്ഷ്യമെന്നും അദ്ദേഹം പറഞ്ഞു.

200 ഉദ്യോഗസ്ഥർ വിവരങ്ങൾ കൈമാറുന്നുണ്ടെന്ന് അവകാശവാദം

കേന്ദ്ര സർക്കാരിലെ ഏകദേശം 200 ഉദ്യോഗസ്ഥർ തങ്ങളുമായി ബന്ധപ്പെടുന്നുണ്ടെന്നും വിവിധ വകുപ്പുകളിലെ വിവരങ്ങൾ കൈമാറുന്നുണ്ടെന്നും രാഹുൽ ഗാന്ധി അവകാശപ്പെട്ടു. എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി.), സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (സി.ബി.ഐ.), വിദേശകാര്യ മന്ത്രാലയം എന്നിവിടങ്ങളിൽനിന്നുള്ള വിവരങ്ങളും ലഭിക്കുന്നുണ്ടെന്നാണ് അദ്ദേഹത്തിന്റെ വാദം.

ഇന്ത്യ എന്ന ആശയത്തെ ആക്രമിച്ച അഞ്ച് കുറ്റവാളികളെ നിയമത്തിന് മുന്നിൽ കൊണ്ടുവരുമെന്നും പോരാട്ടത്തിൽനിന്ന് പിന്നോട്ടില്ലെന്നും രാഹുൽ പറഞ്ഞു. ഭരണഘടന സംരക്ഷിക്കാൻ ആഗ്രഹിക്കുന്ന എല്ലാവരും ഇന്ത്യ സഖ്യം നടത്തുന്ന മാർച്ചിൽ പങ്കെടുക്കണമെന്നും അദ്ദേഹം ആഹ്വാനം ചെയ്തു.