ന്യൂഡെൽഹി:ഫ്യൂച്ചർ ആൻഡ് ഓപ്ഷൻസ് (F&O) വിപണിയിലെ കൃത്രിമങ്ങളെച്ചൊല്ലി നരേന്ദ്ര മോദി സർക്കാരിനെതിരെ രൂക്ഷവിമർശനവുമായി കോൺഗ്രസ് നേതാവ് രാഹുൽ ഗാന്ധി രംഗത്ത്. വൻകിടക്കാർ F&O വിപണിയിൽ കൃത്രിമം കാണിക്കുമ്പോൾ കേന്ദ്രസർക്കാർ നിശബ്ദത പാലിക്കുകയാണെന്നും, ഇത് ധനികരെ കൂടുതൽ ധനികരാക്കുകയും സാധാരണ നിക്ഷേപകരെ നാശത്തിന്റെ വക്കിലെത്തിക്കുകയും ചെയ്യുന്നുവെന്നും രാഹുൽ ആരോപിച്ചു.

ന്യൂയോർക്ക് ആസ്ഥാനമായുള്ള ഹെഡ്ജ് ഫണ്ട് Jane Street ഇന്ത്യൻ സൂചികകളിൽ കൃത്രിമം കാണിച്ചതായി സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ (സെബി) വെള്ളിയാഴ്ച പുറപ്പെടുവിച്ച ഉത്തരവിൽ കണ്ടെത്തിയതിന് പിന്നാലെയാണ് രാഹുൽ ഗാന്ധിയുടെ ഈ പരാമർശങ്ങൾ. കറൻസി, F&O വിപണികളിൽ ഒരേ സമയം നിക്ഷേപം നടത്തി ലാഭം നേടാൻ Jane Street ശ്രമിച്ചുവെന്നാണ് സെബി കണ്ടെത്തിയത്.
F&O വിപണിയിലെ ഈ തട്ടിപ്പുകളെക്കുറിച്ച് താൻ 2024-ൽ തന്നെ മുന്നറിയിപ്പ് നൽകിയിരുന്നതായി രാഹുൽ ഗാന്ധി 'എക്സി'ൽ കുറിച്ചു. "F&O വിപണി 'വൻകിടക്കാരുടെ' കളിക്കളമായി മാറിയെന്നും ചെറുകിട നിക്ഷേപകരുടെ പോക്കറ്റുകൾ തുടർച്ചയായി കാലിയാക്കുന്നുവെന്നും ഞാൻ 2024-ൽ വ്യക്തമായി പറഞ്ഞിരുന്നു. ഇപ്പോൾ Jane Street (ഗ്രൂപ്പ്) ആയിരക്കണക്കിന് കോടികൾ കൃത്രിമം കാണിച്ചുവെന്ന് സെബി തന്നെ സമ്മതിക്കുന്നു. ഇത്രയും കാലം സെബി എന്തുകൊണ്ടാണ് നിശബ്ദത പാലിച്ചത്?" രാഹുൽ തന്റെ പോസ്റ്റിൽ ചോദിച്ചു.

ഈ വെളിപ്പെടുത്തലിനോട് കേന്ദ്രസർക്കാർ കണ്ണടയ്ക്കുകയാണെന്ന് ആരോപിച്ച രാഹുൽ, വിപണിയിൽ തട്ടിപ്പ് നടത്തുന്ന കൂടുതൽ ആളുകളുണ്ടോ എന്നും ആരാഞ്ഞു. അതേസമയം, രാഹുൽ ഗാന്ധി ഓഹരി വിപണിയെക്കുറിച്ച് ഭയവും തെറ്റായ വിവരങ്ങളും പ്രചരിപ്പിക്കുകയാണെന്ന് ബിജെപി തിരിച്ചടിച്ചു. മ്യൂച്വൽ ഫണ്ടുകളിലൂടെ ഓഹരി വിപണിയിൽ പങ്കെടുത്ത ലക്ഷക്കണക്കിന് ചെറുകിട നിക്ഷേപകർക്ക് ഇത് സമ്പത്ത് സൃഷ്ടിച്ചിട്ടുണ്ടെന്നും ബിജെപി അവകാശപ്പെട്ടു.