ന്യൂഡൽഹി: തിരഞ്ഞെടുപ്പ് കമ്മിഷൻ ആസ്ഥാനത്തേക്ക് ഇന്ത്യാ സഖ്യം നടത്തിയ പ്രതിഷേധ മാർച്ചിനിടെ ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയെ ഡൽഹി പൊലീസ് അറസ്റ്റ് ചെയ്തു. ആകാശവാണി ഭവനിൽ പ്രതിഷേധം തുടരുന്നതിനിടെയാണ് രാത്രി 7.45ഓടെ രാഹുൽ ഗാന്ധി, പ്രിയങ്ക ഗാന്ധി, കെ.സി. വേണുഗോപാൽ എന്നിവരെയടക്കം പൊലീസ് കസ്റ്റഡിയിലെടുത്തത്. എംപിമാരായ കൊടിക്കുന്നിൽ സുരേഷ്, ബെന്നി ബഹനാൻ ഉൾപ്പെടെയുള്ള നേതാക്കളെയും പൊലീസ് കസ്റ്റഡിയിലെടുത്തു.

പ്രവർത്തകർ രാഹുൽ ഗാന്ധിക്ക് ചുറ്റും വലയം തീർത്ത് പൊലീസ് നടപടിയെ പ്രതിരോധിക്കാൻ ശ്രമിച്ചെങ്കിലും പൊലീസ് അദ്ദേഹത്തെ വാഹനത്തിലേക്ക് മാറ്റുകയായിരുന്നു. പ്രതിഷേധക്കാരെ നാല് ബസുകളിലായാണ് പൊലീസ് കൊണ്ടുപോയത്.

തിരഞ്ഞെടുപ്പ് കമ്മിഷനെ നേരിൽ കാണാതെ പ്രതിഷേധം അവസാനിപ്പിക്കില്ലെന്ന നിലപാടിലായിരുന്നു രാഹുൽ ഗാന്ധി. എന്നാൽ, കമ്മിഷനെ കാണാൻ ഒരാഴ്ചയ്ക്ക് ശേഷം സമയം നൽകാമെന്നാണ് അറിയിച്ചതെന്നാണ് വിവരം. രാത്രിയിലും ആകാശവാണി ഭവനിൽ പ്രതിഷേധം തുടരാൻ അനുവദിക്കില്ലെന്നും പിരിഞ്ഞുപോകണമെന്നും പൊലീസ് നേരത്തെ പ്രതിഷേധക്കാരോട് ആവശ്യപ്പെട്ടിരുന്നു.

മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ടാണ് ഇന്ത്യാ സഖ്യത്തിലെ എംപിമാർ പ്രതിഷേധം നടത്തിയത്. പാർലമെന്റിന് സമീപത്തുനിന്ന് ആരംഭിച്ച മാർച്ച് തിരഞ്ഞെടുപ്പ് കമ്മിഷൻ ആസ്ഥാനത്തേക്കാണ് നീങ്ങിയത്. പ്രതിഷേധക്കാരെ തടയാൻ ഡൽഹി പൊലീസ് നേരത്തെ തന്നെ ബാരിക്കേഡുകൾ സ്ഥാപിച്ചിരുന്നു.

ബാരിക്കേഡുകൾ മറികടക്കുന്നതിനിടെ രാഹുൽ ഗാന്ധിയും മറ്റ് നേതാക്കളും ആകാശവാണി ഭവനിലേക്ക് പ്രവേശിച്ചു. ഇവിടെനിന്ന് തിരഞ്ഞെടുപ്പ് കമ്മിഷൻ ഓഫിസിലേക്ക് കടക്കാൻ രാഹുൽ ശ്രമിച്ചെങ്കിലും പൊലീസ് തടഞ്ഞു. തുടർന്ന് എംപിമാരെ കസ്റ്റഡിയിലെടുത്ത് ബസുകളിലേക്ക് മാറ്റുകയായിരുന്നു.

ഇതിനിടെ, രാജ്യത്തെ ജനാധിപത്യം പൂർണമായും തകർന്നുവെന്ന രൂക്ഷ വിമർശനവുമായി രാഹുൽ ഗാന്ധി രംഗത്തെത്തി. ഗ്യാനേഷ് കുമാറിനെയും മറ്റ് തിരഞ്ഞെടുപ്പ് കമ്മിഷൻ അംഗങ്ങളെയും കാണാൻ ലോക്‌സഭയിലെയും രാജ്യസഭയിലെയും മുന്നൂറോളം എംപിമാർ എത്തിയിട്ടും പൊലീസ് അവരെ തടഞ്ഞുവെന്ന് അദ്ദേഹം ആരോപിച്ചു.

തിരഞ്ഞെടുപ്പ് കമ്മിഷൻ ഓഫിസിൽനിന്ന് വെറും 50 മീറ്റർ അകലെ ജനപ്രതിനിധികളെ തടഞ്ഞത് എന്തിനാണെന്ന് മനസിലാകുന്നില്ലെന്നും രാഹുൽ പറഞ്ഞു. തിരഞ്ഞെടുപ്പ് കൃത്യമായി നടത്തുകയാണ് കമ്മിഷന്റെ ചുമതലയെന്നും എന്നാൽ മുന്നൂറോളം എംപിമാർ കാണാനെത്തിയപ്പോൾ കമ്മിഷൻ അവരെ കാണാൻ തയ്യാറാകാത്തത് ഗുരുതരമാണെന്നും അദ്ദേഹം ആരോപിച്ചു.

പ്രധാനമന്ത്രി നരേന്ദ്ര മോദി ‘വോട്ട് മോഷ്ടിച്ച്’ രാജ്യത്തെ ഹൈജാക്ക് ചെയ്തുവെന്നും അമിത് ഷാ, ആർഎസ്എസ് മേധാവി മോഹൻ ഭാഗവത്, ഗ്യാനേഷ് കുമാർ എന്നിവർ അതിന് സഹായം നൽകിയെന്നും രാഹുൽ ആരോപിച്ചു. രാജ്യത്തെ ജനാധിപത്യത്തോട് ചെയ്തത് രാജ്യദ്രോഹമാണെന്നും ഇതിന് ഉത്തരവാദികളായ ആരും രക്ഷപ്പെടില്ലെന്നും അദ്ദേഹം പറഞ്ഞു.

ബിജെപിക്കെതിരായ രാഷ്ട്രീയ പോരാട്ടം മാത്രമല്ല, രാജ്യത്തെ ജനാധിപത്യം സംരക്ഷിക്കാനുള്ള പോരാട്ടമാണ് നടത്തുന്നതെന്നും രാഹുൽ ഗാന്ധി വ്യക്തമാക്കി.

പൊലീസ് തടഞ്ഞതിനെ തുടർന്ന് ആകാശവാണി ഭവനു മുന്നിലെ ആൽമരച്ചുവട്ടിൽ ആദ്യം ഇരുന്നാണ് രാഹുൽ പ്രതിഷേധിച്ചത്. പിന്നീട് പ്രവർത്തകർ എത്തിച്ച പായയിലിരുന്നും അദ്ദേഹം പ്രതിഷേധം തുടർന്നു. കെ.സി. വേണുഗോപാൽ, പ്രിയങ്ക ഗാന്ധി, പവൻ ഖേര എന്നിവരുൾപ്പെടെയുള്ള നേതാക്കൾ അദ്ദേഹത്തിനൊപ്പമുണ്ടായിരുന്നു.

പ്രതിഷേധക്കാരെ കസ്റ്റഡിയിലെടുക്കാനുള്ള പൊലീസ് നടപടി തുടരുന്നതിനിടെയാണ് രാഹുൽ ഗാന്ധിയെയും മറ്റ് നേതാക്കളെയും വാഹനങ്ങളിൽ മാറ്റിയത്. തിരഞ്ഞെടുപ്പ് കമ്മിഷൻ ആസ്ഥാനത്തേക്കുള്ള മാർച്ച് തടഞ്ഞതിനെതിരെ ഇന്ത്യാ സഖ്യത്തിലെ എംപിമാർ ശക്തമായ പ്രതിഷേധമാണ് ഉയർത്തിയത്.