ദോഹ: തിരഞ്ഞെടുപ്പ് ഫലങ്ങൾ പ്രവചിക്കാൻ പലരും മടിക്കുമ്പോൾ, കണക്കുകൾ ഒട്ടും പിഴക്കാതെ പ്രവചിച്ച് റേഡിയോ സുനോ ബൂത്ത് 140 പ്രവചന മത്സരത്തിൽ ഖത്തർ പ്രവാസിക്ക് ഉജ്ജ്വല വിജയം. മലപ്പുറം അരീക്കോട്, മൂർക്കനാട് സ്വദേശിയായ അഹ്മദ് നിയാസ് ആണ് ഫലം കൃത്യമായി പ്രവചിച്ച് ഏവരെയും അത്ഭുതപ്പെടുത്തിയത്.
മാർച്ച് 26-ന് റേഡിയോ സുനോയുടെ ഔദ്യോഗിക ഫേസ്ബുക്ക് പേജിലൂടെ സംഘടിപ്പിച്ച മത്സരത്തിലാണ് നിയാസ് തന്റെ പ്രവചനം രേഖപ്പെടുത്തിയത്. രാഷ്ട്രീയ കേരളം ഉറ്റുനോക്കിയ മത്സരത്തിൽ
യു.ഡി.എഫ്: 102
എൽ.ഡി.എഫ്: 35
എൻ.ഡി.എ: 3 എന്നിങ്ങനെ സീറ്റുകൾ ലഭിക്കുമെന്നായിരുന്നു നിയാസിന്റെ കണക്കുകൂട്ടൽ. ഫലം പുറത്തുവന്നപ്പോൾ ഈ പ്രവചനം അക്ഷരംപ്രതി ശരിയാവുകയായിരുന്നു.
നിലവിൽ ഖത്തർ കെ.എം.സി.സി ഏറനാട് മണ്ഡലം ജനറൽ സെക്രട്ടറിയായി സേവനമനുഷ്ഠിക്കുന്ന അഹ്മദ് നിയാസ്, പ്രവാസലോകത്തെ സജീവ രാഷ്ട്രീയ-സാമൂഹിക പ്രവർത്തകൻ കൂടിയാണ്. കൃത്യമായ രാഷ്ട്രീയ നിരീക്ഷണമാണ് ഇത്തരമൊരു വിജയത്തിലേക്ക് തന്നെ എത്തിച്ചതെന്ന് അദ്ദേഹം പ്രതികരിച്ചു. ജേതാവായ നിയാസിനെ തേടി പ്രവാസലോകത്തുനിന്നും നാട്ടിൽ നിന്നും അഭിനന്ദന പ്രവാഹമാണ് എത്തുന്നത്.
