ദോഹ: ഖത്തർ സ്റ്റാർസ് ലീഗ് (QSL) ഫുട്ബോൾ കപ്പ് ഫൈനൽ മത്സരത്തിന്റെ തീയതിയിൽ മാറ്റം. 2025-2026 സീസണിലെ കലാശപ്പോരാട്ടം നിശ്ചയിച്ചിരുന്നതിനേക്കാൾ ഒരു ദിവസം നേരത്തെ, ഏപ്രിൽ 15 ബുധനാഴ്ച നടക്കുമെന്ന് ഖത്തർ സ്റ്റാർസ് ലീഗ് ഫൗണ്ടേഷൻ അറിയിച്ചു.
നേരത്തെ ഏപ്രിൽ 16 വ്യാഴാഴ്ച നടത്താനിരുന്ന മത്സരമാണ് ഇപ്പോൾ ബുധനാഴ്ചത്തേക്ക് മാറ്റിയിരിക്കുന്നത്. താരങ്ങളുടെ സാങ്കേതിക നിലവാരം ഉയർത്തുന്നതിനും സീസണിൽ കൂടുതൽ മത്സരങ്ങൾ കളിക്കാൻ അവസരമൊരുക്കുന്നതിനുമായാണ് ക്യു.എസ്.എൽ കപ്പ് സംഘടിപ്പിക്കുന്നത്.
ഒന്നാം ഡിവിഷനിലെയും രണ്ടാം ഡിവിഷനിലെയും ഉൾപ്പെടെ 20 ക്ലബ്ബുകളാണ് ഈ ടൂർണമെന്റിൽ പങ്കെടുത്തത്. ആദ്യ ഘട്ടത്തിൽ ഓരോ ടീമും 10 മത്സരങ്ങൾ വീതം കളിച്ചു. ഇതിൽ നിന്ന് ഒന്നും രണ്ടും സ്ഥാനങ്ങൾ നേടിയവരും മറ്റ് ആറ് ടീമുകളും രണ്ടാം ഘട്ടത്തിലേക്ക് യോഗ്യത നേടി. തുടർന്ന് നടന്ന ആവേശകരമായ സെമി ഫൈനലുകൾക്ക് ശേഷമാണ് അൽ റയ്യാൻ, അൽ മുഐദർ ടീമുകൾ ഫൈനലിൽ പ്രവേശിച്ചത്.
ബുധനാഴ്ച വൈകുന്നേരം ഏഴിന് സ്റ്റേഡിയം 974-ൽ നടക്കുന്ന ഫൈനലിൽ കിരീടം ആര് നേടുമെന്ന ആവേശത്തിലാണ് ഫുട്ബോൾ ആരാധകർ.
