ദോഹ: ക്യു.എൻ.ബി ഗ്രൂപ്പും മാസ്റ്റർകാർഡും ചേർന്ന് സംഘടിപ്പിച്ച ഡെബിറ്റ് കാർഡ് പ്രചാരണ പരിപാടിയുടെ ബമ്പർ സമ്മാനമായ 2026 മോഡൽ മക്ലാറൻ അർതുറ സ്പൈഡർ (McLaren Artura Spider) സൂപ്പർ കാർ വിജയിക്ക് കൈമാറി. നാസർ അബ്ദുൽഹാദി അൽ ഹാജ്രിയാണ് സമ്മാനത്തിന് അർഹനായത്.
വാണിജ്യ വ്യവസായ മന്ത്രാലയ (MoCI) പ്രതിനിധികളുടെ സാന്നിധ്യത്തിൽ നടന്ന ഔദ്യോഗിക നറുക്കെടുപ്പിലൂടെയാണ് വിജയിയെ തിരഞ്ഞെടുത്തത്. ദോഹയിൽ നടന്ന ചടങ്ങിൽ ക്യു.എൻ.ബി, മാസ്റ്റർകാർഡ് എന്നിവയുടെ മുതിർന്ന ഉദ്യോഗസ്ഥർചേർന്ന് വിജയിക്ക് താക്കോൽ കൈമാറി.
ക്യു.എൻ.ബി മാസ്റ്റർകാർഡ് ഡെബിറ്റ് കാർഡുകൾ ദൈനംദിന ആവശ്യങ്ങൾക്ക് ഉപയോഗിക്കുന്ന ഉപഭോക്താക്കൾക്കായി മെയ് 17 മുതൽ ജൂലൈ 2 വരെയായിരുന്നു ഈ ആനുകൂല്യ പദ്ധതി സംഘടിപ്പിച്ചത്. ഉപഭോക്താക്കളുടെ നിരന്തരമായ പിന്തുണയ്ക്കും ആത്മാർത്ഥതയ്ക്കും നന്ദി സൂചകമായാണ് ഇത്തരം അപൂർവ്വ സമ്മാനങ്ങൾ ഒരുക്കുന്നതെന്ന് ക്യു.എൻ.ബി ഗ്രൂപ്പ് റീട്ടെയിൽ ബാങ്കിംഗ് സീനിയർ എക്സിക്യൂട്ടീവ് വൈസ് പ്രസിഡന്റ് ആദിൽ അലി അൽ മൽക്കി പറഞ്ഞു.
ഉപഭോക്താക്കൾക്ക് സുരക്ഷിതവും ലളിതവുമായ ഡിജിറ്റൽ ഇടപാടുകൾ ഉറപ്പാക്കുന്നതിനൊപ്പം മികച്ച അനുഭവങ്ങൾ സമ്മാനിക്കാനാണ് ക്യു.എൻ.ബിയുമായി ചേർന്ന് പ്രവർത്തിക്കുന്നതെന്ന് ഖത്തറിലെയും കുവൈത്തിലെയും മാസ്റ്റർകാർഡ് കൺട്രി മാനേജർ എർദെം ചാക്കർ വ്യക്തമാക്കി.
