ദോഹ: വിശുദ്ധ റമദാൻ മാസത്തിന്റെ തുടക്കത്തോടനുബന്ധിച്ച് ഖത്തർ അമീർ ഷെയ്ഖ് തമീം ബിൻ ഹമദ് അൽതാനി ലുസൈൽ കൊട്ടാരത്തിൽ വെച്ച് ആശംസകൾ സ്വീകരിച്ചു. ഇന്നലെ വൈകുന്നേരം നടന്ന ചടങ്ങിൽ പ്രമുഖ വ്യക്തികളും പൗരന്മാരും അമീറിനെ നേരിൽ കണ്ട് റമദാൻ ആശംസകൾ നേർന്നു.
ശൂറാ കൗൺസിൽ സ്പീക്കർ ഹസ്സൻ ബിൻ അബ്ദുള്ള അൽ ഗാനിം, വിവിധ മന്ത്രാലയങ്ങളിലെ മന്ത്രിമാർ, അണ്ടർ സെക്രട്ടറിമാർ, ശൂറാ കൗൺസിൽ അംഗങ്ങൾ, രാജ്യത്തെ പ്രമുഖ ഷെയ്ഖുമാർ, ഖത്തരി പൗരന്മാർ എന്നിവരെ അമീർ സ്വീകരിച്ചു.
വിശുദ്ധ മാസത്തിന്റെ അനുഗ്രഹങ്ങൾ രാജ്യത്തിനും ജനങ്ങൾക്കും ഒരുപോലെ ലഭിക്കട്ടെയെന്ന് അമീർ ആശംസകൾ കൈമാറിക്കൊണ്ട് പ്രാർത്ഥിച്ചു. അമീറിന്റെ വ്യക്തിഗത പ്രതിനിധി ഷെയ്ഖ് ജാസിം ബിൻ ഹമദ് അൽതാനി, ഷെയ്ഖ് അബ്ദുള്ള ബിൻ ഖലീഫ അൽതാനി, ഷെയ്ഖ് ജാസിം ബിൻ ഖലീഫ അൽതാനി എന്നിവരും മറ്റ് ഉന്നത ഉദ്യോഗസ്ഥരും സ്വീകരണ ചടങ്ങിൽ പങ്കെടുത്തു.
