ദോഹ: ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുൽറഹ്മാൻ ബിൻ ജാസിം അൽ താനി, ഐക്യരാഷ്ട്രസഭ (യു.എൻ) ജനറൽ സെക്രട്ടറി അന്റോണിയോ ഗുട്ടെറസുമായി ഫോണിൽ ചർച്ച നടത്തി. ഖത്തറും ഐക്യരാഷ്ട്രസഭയും തമ്മിലുള്ള സഹകരണ ബന്ധങ്ങൾ ശക്തമാക്കുന്നതിനെക്കുറിച്ചും അത് കൂടുതൽ ഊർജ്ജിതമാക്കാനുള്ള വഴികളെക്കുറിച്ചും ഇരുനേതാക്കളും സംസാരിച്ചു.
പ്രാദേശിക തലത്തിലെ സുപ്രധാന വികാസങ്ങൾ, പ്രത്യേകിച്ച് അമേരിക്കയും ഇറാനും തമ്മിൽ രൂപീകരിച്ച പുതിയ കരാർ, മേഖലയിൽ സുരക്ഷയും സ്ഥിരതയും വർദ്ധിപ്പിക്കുന്നതിനായി നടത്തുന്ന ശ്രമങ്ങൾ എന്നിവ ചർച്ചയിൽ പ്രധാന വിഷയങ്ങളായി.
പ്രാദേശിക സുരക്ഷയും സ്ഥിരതയും മെച്ചപ്പെടുത്തുന്നതിനും, നിലനിൽക്കുന്ന പ്രശ്നങ്ങൾക്ക് ചർച്ചകളിലൂടെയും സമാധാനപരമായ മാർഗ്ഗങ്ങളിലൂടെയും സുസ്ഥിരമായ പരിഹാരം കാണുന്നതിനുമുള്ള എല്ലാ നല്ല ശ്രമങ്ങൾക്കും ഖത്തറിന്റെ പൂർണ്ണ പിന്തുണ പ്രധാനമന്ത്രി ആവർത്തിച്ചു വ്യക്തമാക്കി. അന്താരാഷ്ട്ര നിയമങ്ങളുടെയും നല്ല അയൽപക്ക ബന്ധങ്ങളുടെയും തത്ത്വങ്ങൾക്ക് അനുസൃതമായിരിക്കണം ഈ നീക്കങ്ങളെന്നും അദ്ദേഹം കൂട്ടിച്ചേർത്തു. ഇത്തരം ശ്രമങ്ങൾ സഹകരണത്തിന്റെയും വികസനത്തിന്റെയും സമൃദ്ധിയുടെയും പുതിയ വാതിലുകൾ തുറക്കുമെന്നും മേഖലയിലെയും ലോകത്തെയും ജനങ്ങളുടെ പൊതുതാത്പര്യങ്ങൾ സംരക്ഷിക്കാൻ സഹായിക്കുമെന്നും ഖത്തർ പ്രധാനമന്ത്രി ചർച്ചയിൽ ചൂണ്ടിക്കാട്ടി.
