ഖത്തർ ആഭ്യന്തര മന്ത്രി കൂടിക്കാഴ്ച നടത്തി
ദോഹ: ഖത്തർ ആഭ്യന്തര മന്ത്രിയും ആഭ്യന്തര സുരക്ഷാ സേന (ലഖ്വിയ) കമാൻഡറുമായ ശൈഖ് ഖലീഫ ബിൻ ഹമദ് ബിൻ ഖലീഫ ആൽഥാനി, സിറിയയുടെ അടിയന്തിര ഘട്ട-ദുരന്ത നിവാരണ മന്ത്രി റാഇദ് അൽ സാലിഹുമായി കൂടിക്കാഴ്ച നടത്തി. സംയുക്ത ത്രികക്ഷി അർബൻ സെർച്ച് ആൻഡ് റെസ്ക്യൂ (Urban Search and Rescue) പരിശീലനത്തിന്റെ സമാപനത്തോടനുബന്ധിച്ചായിരുന്നു ഇരുനേതാക്കളുടെയും കൂടിക്കാഴ്ച.
ഇരു രാജ്യങ്ങളും തമ്മിലുള്ള ശക്തമായ സാഹോദര്യ ബന്ധവും നിലവിലുള്ള പങ്കാളിത്തവും കൂടിക്കാഴ്ചയിൽ ചർച്ചയായി. അടിയന്തര ഘട്ട-ദുരന്ത നിവാരണം, ശേഷി വികസനം, പരിശീലനം എന്നീ മേഖലകളിൽ സഹകരണവും ഏകോപനവും വർദ്ധിപ്പിക്കുന്നതിനുള്ള വഴികളും ഇരുമന്ത്രിമാരും വിലയിരുത്തി.
ദുരന്തങ്ങളെ നേരിടാനുള്ള സന്നദ്ധതയും പ്രതികരണ സംവിധാനങ്ങളും വികസിപ്പിക്കുന്നതിനും, ഈ മേഖലയിൽ ഖത്തറിനുള്ള അത്യാധുനിക വൈദഗ്ധ്യം പ്രയോജനപ്പെടുത്തുന്നതിനും പുതിയ സഹകരണ ശ്രമങ്ങൾ ഊന്നൽ നൽകും. ഇരുരാജ്യങ്ങളുടെയും പൊതുവായ താല്പര്യങ്ങൾ സംരക്ഷിക്കുന്നതിനും നേതൃത്വങ്ങളുടെ ദീർഘവീക്ഷണങ്ങൾ സാക്ഷാത്കരിക്കുന്നതിനും ഈ പങ്കാളിത്തം സഹായകരമാകുമെന്ന് വിലയിരുത്തപ്പെട്ടു.
