ദോഹ:മേഖലയിലെ സംഘർഷങ്ങൾ ലഘൂകരിക്കുന്നതിനും നയതന്ത്ര ശ്രമങ്ങൾ ശക്തമാക്കുന്നതിനുമുള്ള ചർച്ചകളുമായി ഖത്തർ അമീർ ശൈഖ് തമീം ബിൻ ഹമദ് അൽ താനിയും യു.എസ് പ്രസിഡന്റ് ഡൊണാൾഡ് ട്രംപും ഫോണിൽ സംസാരിച്ചു. ഖത്തർ വാർത്താ ഏജൻസിയായ 'ഖ്ന'യാണ് ഇക്കാര്യം റിപ്പോർട്ട് ചെയ്തത്.
ഇരു രാജ്യങ്ങളും തമ്മിലുള്ള തന്ത്രപ്രധാനമായ ബന്ധങ്ങളും സഹകരണവും കൂടുതൽ ദൃഢമാക്കുന്നതിനുള്ള വഴികൾ നേതാക്കൾ ചർച്ച ചെയ്തു. പ്രാദേശിക സംഭവവികാസങ്ങളും, പ്രത്യേകിച്ച് മിഡിൽ ഈസ്റ്റിലെ സംഘർഷങ്ങൾ കുറയ്ക്കുന്നതിനുള്ള നയതന്ത്ര നീക്കങ്ങളും അവലോകനം ചെയ്യപ്പെട്ടു.
മേഖലയിലെ പ്രതിസന്ധിക്ക് സമഗ്രമായ പരിഹാരം കാണുന്നതിനും സമാധാനവും സുസ്ഥിരതയും കൈവരിക്കുന്നതിനുമായി ഖത്തർ നടത്തുന്ന മധ്യസ്ഥ ശ്രമങ്ങളെയും നയതന്ത്ര ഇടപെടലുകളെയും കുറിച്ച് ഇരു നേതാക്കളും സംസാരിച്ചു. പ്രശ്നങ്ങൾ പരിഹരിക്കുന്നതിന് നയതന്ത്ര മാർഗ്ഗങ്ങൾ തുടരേണ്ടതിന്റെയും, സമുദ്രത്തിലെ സ്വതന്ത്ര സഞ്ചാരവും ഊർജ്ജ വിതരണ സുരക്ഷയും ഉറപ്പാക്കേണ്ടതിന്റെയും പ്രാധാന്യം അമീറും യു.എസ് പ്രസിഡന്റും എടുത്തുപറഞ്ഞു.
