ദോഹ: ഖത്തർ അമീർ ശൈഖ് തമീം ബിൻ ഹമദ് അൽഥാനിയും അമേരിക്കൻ പ്രസിഡന്റ് ഡൊണാൾഡ് ട്രംപും തമ്മിൽ ടെലിഫോൺ സംഭാഷണം നടത്തി. മിഡിൽ ഈസ്റ്റിലെ ഏറ്റവും പുതിയ രാഷ്ട്രീയ-സുരക്ഷാ സാഹചര്യങ്ങളും, മേഖലയിലെ സംഘർഷാവസ്ഥ ലഘൂകരിക്കുന്നതിനും സ്ഥിരത നിലനിർത്തുന്നതിനുമുള്ള അന്താരാഷ്ട്ര ശ്രമങ്ങളും ഇരു നേതാക്കളും വിലയിരുത്തി.
മേഖലയിൽ കൂടുതൽ സംഘർഷങ്ങളും അസ്വാരസ്യങ്ങളും ഒഴിവാക്കാൻ എല്ലാ കക്ഷികളും ചർച്ചകൾക്കും നയതന്ത്ര പരിഹാരങ്ങൾക്കും മുൻഗണന നൽകണമെന്ന് അമീർ ശൈഖ് തമീം ബിൻ ഹമദ് ആൽ ഥാനി ആവശ്യപ്പെട്ടു. പ്രാദേശിക സുരക്ഷയും സമാധാനവും ഉറപ്പാക്കാൻ നയതന്ത്ര നീക്കങ്ങൾ മാത്രമാണ് വഴിയെന്നും അമീർ ഊന്നിപ്പറഞ്ഞു.
മധ്യസ്ഥ ശ്രമങ്ങളിൽ ഖത്തർ വഹിക്കുന്ന പങ്കിനെ അമേരിക്കൻ പ്രസിഡന്റ് ഡൊണാൾഡ് ട്രംപ് പ്രത്യേകം പ്രശംസിച്ചു. വിവിധ കക്ഷികൾക്കിടയിൽ ആശയവിനിമയം സുഗമമാക്കുന്നതിനും ഭിന്നതകൾ പരിഹരിക്കുന്നതിനും ഖത്തർ നടത്തുന്ന സമാധാന ശ്രമങ്ങളെ അദ്ദേഹം അഭിനന്ദിച്ചു.
ഖത്തറും അമേരിക്കയും തമ്മിലുള്ള ശക്തമായ തന്ത്രപരമായ ബന്ധങ്ങളും ഇരു രാജ്യങ്ങളുടെയും പൊതുവായ താൽപ്പര്യങ്ങൾ മുൻനിർത്തി വിവിധ മേഖലകളിൽ ഉഭയകക്ഷി സഹകരണം കൂടുതൽ ശക്തിപ്പെടുത്തുന്നതിനുള്ള വഴികളും ഫോൺ സംഭാഷണത്തിൽ ഇരു നേതാക്കളും ചർച്ച ചെയ്തു.
