ദോഹ: ചരിത്രത്തിലെ ഏറ്റവും വലിയ മെഡൽ കൊയ്ത്തുമായി നാലാമത് ജി.സി.സി ഗെയിംസിൽ ഖത്തറിന് ഉജ്ജ്വല കിരീടം. ദോഹ ആതിഥേയത്വം വഹിച്ച കായികമാമാങ്കത്തിൽ 48 സ്വർണവും 50 വെള്ളിയും 36 വെങ്കലവുമടക്കം ആകെ 134 മെഡലുകൾ നേടിയാണ് ആതിഥേയരായ 'ടീം ഖത്തർ' ഒന്നാം സ്ഥാനം നിലനിർത്തിയത്. ജി.സി.സി ഗെയിംസിന്റെ ചരിത്രത്തിലെ ഏറ്റവും ഉയർന്ന മെഡൽ നേട്ടമാണിത്.
​ഗെയിംസിന്റെ വൻ വിജയത്തിന് പിന്നാലെ ഖത്തർ ഒളിമ്പിക് കമ്മിറ്റി (QOC) പ്രസിഡന്റും ഗെയിംസ് സംഘാടക സമിതി അധ്യക്ഷനുമായ ശൈഖ് ജൊആൻ ബിൻ ഹമദ് അൽ താനി ജേതാക്കളെയും ദേശീയ ടീമുകളെയും ആദരിച്ചു. ദോഹയിൽ നടന്ന പ്രൗഢഗംഭീരമായ ചടങ്ങിൽ ഒളിമ്പിക് കമ്മിറ്റി ഭാരവാഹികളും വിവിധ ജി.സി.സി പ്രതിനിധികളും പങ്കെടുത്തു.
​ഖത്തറിന്റെ കായിക മേഖലയിലെ ആസൂത്രണത്തിന്റെയും കഠിനാധ്വാനത്തിന്റെയും ഫലമാണ് ഈ വിജയമെന്ന് ശൈഖ് ജൊആൻ പ്രസ്താവിച്ചു. വരാനിരിക്കുന്ന നഗോയ ഏഷ്യൻ ഗെയിംസ് ഉൾപ്പെടെയുള്ള അന്താരാഷ്ട്ര മത്സരങ്ങൾക്കുള്ള മികച്ച തയ്യാറെടുപ്പാണ് ഈ വിജയമെന്ന് കായിക പ്രതിഭകൾ പ്രതികരിച്ചു.
മേഖലയിലെ കടുത്ത മത്സരത്തിനൊടുവിൽ 82 മെഡലുകളുമായി (32 സ്വർണം, 27 വെള്ളി, 23 വെങ്കലം) സൗദി അറേബ്യ രണ്ടാം സ്ഥാനത്തെത്തി. 63 മെഡലുകൾ നേടിയ ബഹ്‌റൈനാണ് മൂന്നാം സ്ഥാനത്ത്. കുവൈറ്റ്, യു.എ.ഇ, ഒമാൻ എന്നീ രാജ്യങ്ങളാണ് തൊട്ടുപിന്നിൽ. മെയ് 11 മുതൽ 22 വരെ നടന്ന മേളയിൽ 17 കായിക ഇനങ്ങളിലായി 1,400-ലധികം അത്‌ലറ്റുകളും ഉദ്യോഗസ്ഥരും പങ്കെടുത്തു.മികച്ച കായിക അടിസ്ഥാന സൗകര്യങ്ങളും സംഘാടക മികവും കൊണ്ട് ദോഹ വീണ്ടും ലോകത്തിന്റെ കായിക തലസ്ഥാനമായി മാറുകയാണെന്ന് തെളിയിക്കുന്നതായിരുന്നു ഈ പതിപ്പെന്ന് കായിക നിരീക്ഷകർ വിലയിരുത്തി. മികച്ച പിന്തുണ നൽകിയ ഖത്തറിലെ കായികപ്രേമികൾക്കും അധികൃതർ നന്ദി രേഖപ്പെടുത്തി.