ദോഹ: ഒമാന്റെ തലസ്ഥാനമായ മസ്കറ്റിൽ അമേരിക്കയും ഇറാനും തമ്മിൽ നടന്നു വരുന്ന ചർച്ചകളെ ഖത്തർ ഔദ്യോഗികമായി സ്വാഗതം ചെയ്തു. ഈ ചർച്ചകൾ മേഖലയിലെ സുരക്ഷയും സുസ്ഥിരതയും വർദ്ധിപ്പിക്കുന്ന ഒരു സമഗ്ര കരാറിലേക്ക് നയിക്കുമെന്ന് ഖത്തർ പ്രത്യാശ പ്രകടിപ്പിച്ചു.
ചർച്ചകൾക്ക് വേദിയൊരുക്കുകയും സൗകര്യങ്ങൾ ഒരുക്കുകയും ചെയ്ത ഒമാന്റെ നടപടിയെ ഖത്തർ വിദേശകാര്യ മന്ത്രാലയം അഭിനന്ദിച്ചു. മേഖലയിലെ പ്രതിസന്ധികൾ പരിഹരിക്കാൻ ഒമാൻ നടത്തുന്ന നയതന്ത്ര നീക്കങ്ങളെ പ്രസ്താവനയിലൂടെ ഖത്തർ പ്രകീർത്തിച്ചു. തർക്കങ്ങൾ നയതന്ത്ര ചർച്ചകളിലൂടെ പരിഹരിക്കണമെന്നും സംഘർഷങ്ങൾ ലഘൂകരിക്കണമെന്നുമുള്ള നിലപാടിൽ ഖത്തർ ഉറച്ചുനിൽക്കുന്നു. സമാധാനത്തിനായുള്ള എല്ലാ അന്താരാഷ്ട്ര നീക്കങ്ങൾക്കും ഖത്തർ പൂർണ്ണ പിന്തുണ പ്രഖ്യാപിച്ചു. ഇരു രാജ്യങ്ങളുടെയും താൽപ്പര്യങ്ങൾ സംരക്ഷിക്കുന്നതോടൊപ്പം മേഖലയിൽ സമാധാനത്തിന്റെ അടിത്തറ പാകാൻ ഈ ചർച്ചകൾക്ക് സാധിക്കുമെന്ന് മന്ത്രാലയം വ്യക്തമാക്കി.
