​ദോഹ: കുട്ടികൾക്ക് കേവലം കളിവിനോദങ്ങൾക്കപ്പുറം സർഗ്ഗാത്മകതയും വിജ്ഞാനവും പകർന്നുനൽകുന്ന 'എഡ്യൂടൈൻമെന്റ്' (Edutainment) സംസ്കാരത്തിന് ജനപ്രീതി കൂട്ടിക്കൊണ്ട് ഖത്തർ ടോയ് ഫെസ്റ്റിവൽ 2026 ശ്രദ്ധേയമാകുന്നു. കുടുംബസമേതം ആസ്വദിക്കാനും കുട്ടികൾക്ക് പുതിയ കാര്യങ്ങൾ പഠിക്കാനുമുള്ള വലിയൊരു വേദിയായി ഈ മേള മാറിയിരിക്കുകയാണ്. ദോഹ എക്സിബിഷൻ ആൻഡ് കൺവെൻഷൻ സെന്ററിൽ (DECC) നടക്കുന്ന ഈ ഒരു മാസത്തെ വിനോദമാമാങ്കം ജൂലൈ 31 വരെ നീണ്ടുനിൽക്കും.
​വർണ്ണാഭമായ മാസ്‌കോട്ടുകൾ, കൂറ്റൻ ഇൻഫ്ലേറ്റബിളുകൾ, തത്സമയ കലാപ്രകടനങ്ങൾ എന്നിവയ്ക്ക് പുറമെ, കുട്ടികളുടെ ചിന്താശേഷിയും കൂട്ടായ്മയും വളർത്തുന്ന നിരവധി ക്രിയാത്മകമായ മത്സരങ്ങളും കളിയിടങ്ങളും മേളയിൽ ഒരുക്കിയിട്ടുണ്ട്.
​അഗ്നിശമന സേനാംഗങ്ങളായി കുട്ടികൾ; ശ്രദ്ധേയമായി റോളപ്ലേകൾ:
മേളയിലെ ഏറ്റവും ആകർഷകമായ ഇനങ്ങളിലൊന്ന് തത്സമയ രക്ഷാപ്രവർത്തനങ്ങളുടെ മാതൃകയാണ്. കുട്ടികൾ ഫയർ ഫൈറ്റർമാരുടെ വേഷം ധരിച്ച്, ഇൻസ്ട്രക്ടർമാരുടെ സഹായത്തോടെ കൃത്രിമമായി സൃഷ്ടിച്ച തീ കെടുത്തുന്ന രംഗം വലിയ ജനപ്രീതി നേടി. സുരക്ഷാ മുൻകരുതലുകളെക്കുറിച്ച് അറിവ് നൽകുന്നതിനൊപ്പം കുട്ടികളിൽ ആത്മവിശ്വാസവും ഒത്തൊരുമയും വളർത്താൻ ഇത് സഹായിക്കുന്നു. കൂടാതെ ആർട്സ് ആൻഡ് ക്രാഫ്റ്റ്സ്, റോബോട്ടിക്സ്, മറ്റ് നിർമ്മാണാത്മക വർക്ക്‌ഷോപ്പുകൾ എന്നിവയും കുട്ടികളെ സജീവമാക്കുന്നു.കടുത്ത വേനൽച്ചൂടിൽ നിന്ന് രക്ഷനേടാൻ അനുയോജ്യമായ ഏറ്റവും മികച്ച ഇൻഡോർ വിനോദകേന്ദ്രമാണ് ഖത്തർ ടോയ് ഫെസ്റ്റിവൽ എന്ന് ദോഹ നിവാസികൾ സാക്ഷ്യപ്പെടുത്തുന്നു. കുട്ടികൾ എപ്പോഴും മൊബൈൽ, ടിവി സ്ക്രീനുകൾക്ക് മുന്നിൽ സമയം ചിലവഴിക്കുന്ന ശീലം മാറ്റാൻ ഇത്തരം മേളകൾ സഹായിക്കുന്നുണ്ടെന്ന് രക്ഷിതാക്കൾ പറയുന്നു. കുട്ടികൾ കളികളിലൂടെ കാര്യങ്ങൾ പഠിക്കുന്നതാണ് ഏറ്റവും ഫലപ്രദമെന്ന് യുനിസെഫിന്റെ (Unicef) പഠനങ്ങളെ ഉദ്ധരിച്ച് വിദഗ്ധർ ചൂണ്ടിക്കാണിക്കുന്നു.
​മിഡിൽ ഈസ്റ്റിലെ, പ്രത്യേകിച്ച് ഗൾഫ് മേഖലയിലെ ടൂറിസം രംഗത്ത് വലിയ മാറ്റങ്ങളാണ് സംഭവിച്ചുകൊണ്ടിരിക്കുന്നത്. യുഎൻ ടൂറിസത്തിന്റെ (UN Tourism) കണക്കുകൾ പ്രകാരം ലോകത്തിൽ ഏറ്റവും വേഗത്തിൽ വളരുന്ന ടൂറിസം മേഖലയാണ് മിഡിൽ ഈസ്റ്റ്. വർഷം മുഴുവൻ നീണ്ടുനിൽക്കുന്ന വൈവിധ്യമാർന്ന ഫാമിലി ഇവന്റുകളിലൂടെയും ഇൻഡോർ ഫെസ്റ്റിവലുകളിലൂടെയും ടൂറിസം മേഖലയെ കൂടുതൽ സജീവമാക്കാനുള്ള ഖത്തറിന്റെ ശ്രമങ്ങൾക്ക് വലിയൊരു ഊർജ്ജമാണ് ഈ വർഷത്തെ ടോയ് ഫെസ്റ്റിവൽ സമ്മാനിക്കുന്നത്.