ദോഹ: ഖത്തറിലെ വിവിധ സർക്കാർ സ്ഥാപനങ്ങൾക്കിടയിൽ മാധ്യമ ഏകോപനം മെച്ചപ്പെടുത്തുന്നതിനും വാർത്താ വിനിമയ രംഗത്ത് ഏകീകൃത സ്വഭാവം കൊണ്ടുവരുന്നതിനുമായി ഗവൺമെന്റ് കമ്മ്യൂണിക്കേഷൻസ് ഓഫീസ് (GCO) ജോയിന്റ് ന്യൂസ് റൂം ഏകോപന യോഗം വിളിച്ചുചേർത്തു. നിലവിലെ സാഹചര്യങ്ങളും വികസന പ്രവർത്തനങ്ങളും മുൻനിർത്തി സർക്കാർ സ്ഥാപനങ്ങളുടെ മാധ്യമ പ്രവർത്തനങ്ങളെ ഒകോപിപ്പിക്കുകയാണ് യോഗത്തിന്റെ പ്രധാന ലക്ഷ്യം.
ജി.സി.ഒ ഡയറക്ടർ ഷെയ്ഖ് ജാസിം ബിൻ മൻസൂർ ബിൻ ജബർ അൽ താനി യോഗത്തിൽ അധ്യക്ഷത വഹിച്ചു. അറുപതിലധികം സർക്കാർ സ്ഥാപനങ്ങളെ പ്രതിനിധീകരിച്ച് അസിസ്റ്റന്റ് അണ്ടർസെക്രട്ടറിമാർ, എക്സിക്യൂട്ടീവ് ഡയറക്ടർമാർ, വിവിധ വകുപ്പ് മേധാവികൾ തുടങ്ങിയവർ യോഗത്തിൽ പങ്കെടുത്തു.
ദേശീയ തലത്തിൽ സുതാര്യവും സുശക്തവുമായ ഒരു മാധ്യമ സമീപനം കെട്ടിപ്പടുക്കുന്നതിനും, വിവിധ സർക്കാർ വകുപ്പുകൾ നൽകുന്ന വിവരങ്ങൾ കൃത്യതയോടെ പൊതുജനങ്ങളിൽ എത്തിക്കുന്നുവെന്ന് ഉറപ്പാക്കുന്നതിനുമുള്ള തുടർച്ചയായ ശ്രമങ്ങളുടെ ഭാഗമായാണ് ഈ നടപടി. സർക്കാർ സംവിധാനങ്ങളുടെ പ്രവർത്തനങ്ങളിൽ കൂടുതൽ വ്യക്തതയും ഒത്തൊരുമയും കൊണ്ടുവരാൻ ഇത്തരം സംയുക്ത നീക്കങ്ങൾ സഹായകമാകുമെന്ന് യോഗം വിലയിരുത്തി.
