ദോഹ: ഖത്തറിന്റെ ദേശീയ മനുഷ്യാവകാശ ആക്ഷൻ പ്ലാൻ (2026-2030) രൂപീകരിക്കുന്നതിന്റെ ഭാഗമായുള്ള കൺസൾട്ടേറ്റീവ് സെഷനുകൾ ദോഹയിൽ തുടരുന്നു. പദ്ധതി തയ്യാറാക്കുന്നതിനായി നിയോഗിക്കപ്പെട്ട പ്രത്യേക സമിതിയുടെ നേതൃത്വത്തിലാണ് ഞായറാഴ്ചയും യോഗങ്ങൾ ചേർന്നത്.
അന്താരാഷ്ട്ര സഹകരണത്തിനായുള്ള സഹമന്ത്രി ഹെച്ച്.ഇ. മേരിയം ബിൻത് അലി ബിൻ നാസർ അൽ മിസ്നാദിന്റെ അധ്യക്ഷതയിലായിരുന്നു സെഷനുകൾ നടന്നത്. തൊഴിൽ മന്ത്രി ഹെച്ച്.ഇ. ഡോ. അലി ബിൻ സമിഖ് അൽ മർറിയും യോഗത്തിൽ സന്നിഹിതനായിരുന്നു.
തൊഴിൽ മന്ത്രാലയത്തിന്റെ പരിധിയിൽ വരുന്നതും തൊഴിലാളികളുടെ ക്ഷേമവുമായി ബന്ധപ്പെട്ടതുമായ വിവിധ വിഷയങ്ങൾ യോഗം വിശദമായി ചർച്ച ചെയ്തു. രാജ്യത്തെ നിലവിലുള്ള നയങ്ങൾക്കും നിയമങ്ങൾക്കും അനുസൃതമായി ആക്ഷൻ പ്ലാൻ വികസിപ്പിക്കുന്നതിനുള്ള വിവിധ നിർദ്ദേശങ്ങളും കാഴ്ചപ്പാടുകളും യോഗത്തിൽ അവലോകനം ചെയ്തു.
രാജ്യത്ത് മനുഷ്യാവകാശ സംരക്ഷണം കൂടുതൽ ശക്തമാക്കുന്നതിനുള്ള സുപ്രധാനമായ ഒരു ദേശീയ ചട്ടക്കൂടായിരിക്കും ഈ ആക്ഷൻ പ്ലാനെന്ന് യോഗത്തിന്റെ സമാപനത്തിൽ അധികൃതർ അടിവരയിട്ടു പറഞ്ഞു.
