ദോഹ: അന്താരാഷ്ട്ര ഫുട്ബോൾ ഫെഡറേഷൻ (FIFA) പുറത്തുവിട്ട ഏറ്റവും പുതിയ ലോക റാങ്കിംഗിൽ ഖത്തർ ദേശീയ ഫുട്ബോൾ ടീമിന് ഇടിവ്. 1411.06 പോയിന്റോടെ ഖത്തർ ലോക റാങ്കിംഗിൽ 60-ാം സ്ഥാനത്തേക്ക് താഴ്ന്നു.അന്താരാഷ്ട്ര ഫുട്ബോളിൽ അറബ് രാജ്യങ്ങളുടെ പുതിയ റാങ്കിംഗ് നില പരിശോധിച്ചാൽ വലിയ മാറ്റങ്ങളാണ് കാണാനാകുന്നത്.
ഏറ്റവും വലിയ സർപ്രൈസ് മൊറോക്കോയുടേതാണ്! ബ്രസീലിനെ പോലും പിന്നിലാക്കി 1803.99 പോയിന്റോടെ അവർ ലോക റാങ്കിംഗിൽ അഞ്ചാം സ്ഥാനത്തേക്ക് കുതിച്ചെത്തിയിരിക്കുന്നു. ഒരു ആഫ്രിക്കൻ രാജ്യം കൈവരിക്കുന്ന എക്കാലത്തെയും മികച്ച റാങ്കിംഗ് എന്ന അപൂർവ്വ നേട്ടത്തിന്റെ തൊട്ടരികെയാണ് ഇപ്പോൾ 'അറ്റ്ലസ് ലയൺസ്'.
അതേസമയം, സൗദി അറേബ്യ റാങ്കിംഗിൽ മെച്ചപ്പെട്ട് 57-ാം സ്ഥാനത്തേക്ക് കയറിയപ്പോൾ, ഈജിപ്ത് 24-ാം സ്ഥാനത്തും അൽജീരിയ 29-ാം സ്ഥാനത്തും മാറ്റമില്ലാതെ തുടരുന്നു. എന്നാൽ ടുണീഷ്യയ്ക്ക് തിരിച്ചടിയാണ് നേരിട്ടത്; റാങ്കിംഗിൽ പിന്നാക്കം പോയ അവർ നിലവിൽ 58-ാം സ്ഥാനത്താണ് എത്തിനിൽക്കുന്നത്.
