ദോഹ:അറബിക്കടലിൽ ഖത്തർ ഗ്യാസ് ട്രാൻസ്പോർട്ട് കമ്പനിയായ 'നാഖിലാത്തി'ന്റെ 'അൽ മാഇദ' എന്ന ദ്രവീകരിച്ച പ്രകൃതിവാതക (LNG) ടാങ്കറിന് നേരെയുണ്ടായ ആക്രമണത്തിൽ ശക്തമായ പ്രതിഷേധവും അമർഷവും രേഖപ്പെടുത്തി ഖത്തർ ഭരണകൂടം. സമുദ്ര ഗതാഗതത്തിന്റെ സുരക്ഷിതത്വത്തിനും ആഗോള ഊർജ്ജ വിതരണത്തിന്റെ സുരക്ഷയ്ക്കും കടുത്ത ഭീഷണിയുയർത്തുന്ന അപകടകരമായ നടപടിയാണിതെന്ന് ഖത്തർ ചൂണ്ടിക്കാട്ടി.
അന്താരാഷ്ട്ര നിയമങ്ങൾക്കും ഐക്യരാഷ്ട്രസഭയുടെ ചാർട്ടറിനും വിധേയമായി തങ്ങളുടെ സ്വത്തുക്കളും താല്പര്യങ്ങളും സംരക്ഷിക്കുന്നതിനും, കപ്പലുകളുടെയും ജീവനക്കാരുടെയും സുരക്ഷ ഉറപ്പാക്കുന്നതിനും ആവശ്യമായ എല്ലാ നടപടികളും സ്വീകരിക്കാൻ ഖത്തറിന് പൂർണ്ണ അവകാശമുണ്ടെന്ന് വിദേശകാര്യ മന്ത്രാലയം വ്യക്തമാക്കി. സംഭവത്തിന്റെ കൂടുതൽ വിവരങ്ങൾ കണ്ടെത്താനും ഉത്തരവാദികളെ തിരിച്ചറിയാനുമായി ബന്ധപ്പെട്ട അധികൃതർ അന്വേഷണം ആരംഭിച്ചിട്ടുണ്ട്.
ഇത്തരം ഉത്തരവാദിത്തമില്ലാത്ത പ്രവൃത്തികൾ മേഖലയിലെ സുസ്ഥിരതയ്ക്കും ആഗോള സാമ്പത്തിക മേഖലയ്ക്കും ഉണ്ടാക്കുന്ന പ്രത്യാഘാതങ്ങൾ ചെറുതല്ലെന്ന് മന്ത്രാലയം മുന്നറിയിപ്പ് നൽകി. പ്രത്യേകിച്ച്, ഊർജ്ജ കപ്പലുകളെ ലക്ഷ്യമിടുന്നത് വഴി മേഖലയിലെ കടൽ പരിസ്ഥിതിക്കും ജലസുരക്ഷയ്ക്കും ഉണ്ടാകാനിടയുള്ള ഗുരുതരമായ പാരിസ്ഥിതിക നാശങ്ങൾ ആശങ്കാജനകമാണെന്നും വിദേശകാര്യ മന്ത്രാലയം കൂട്ടിച്ചേർത്തു.
