ദോഹ: ജപ്പാനിലെ ഏറ്റവും വലിയ ഊർജ്ജ കമ്പനിയായ ജെറയുമായി (JERA) 27 വർഷത്തെ ദീർഘകാല എൽഎൻജി (LNG) വിതരണ കരാറിൽ ഖത്തർ എനർജി ഒപ്പുവെച്ചു. ദോഹയിൽ നടന്ന 21-ാമത് അന്താരാഷ്ട്ര എൽഎൻജി കോൺഫറൻസിനിടെയാണ് (LNG 2026) ഇരുരാജ്യങ്ങളും തമ്മിലുള്ള നിർണ്ണായക കരാർ ഒപ്പുവെച്ചത്.കരാർ പ്രകാരം പ്രതിവർഷം 3 ദശലക്ഷം ടൺ (3 MTPA) എൽഎൻജി ഖത്തറിൽ നിന്ന് ജപ്പാനിലേക്ക് വിതരണം ചെയ്യും.2028 മുതൽ വിതരണം ആരംഭിക്കുന്ന ഈ കരാറിന് 27 വർഷത്തെ കാലാവധിയാണുള്ളത്.
ഖത്തർ ഊർജ്ജ കാര്യ സഹമന്ത്രിയും ഖത്തർ എനർജി സിഇഒയുമായ സാദ് ഷെരീദ അൽ കാബി, ജെറ ഗ്ലോബൽ സിഇഒ യുകിയോ കാനി എന്നിവർ ചേർന്നാണ് കരാറിൽ ഒപ്പുവെച്ചത്.
1990-കളുടെ തുടക്കം മുതൽ ഖത്തറും ജപ്പാനുമായി തുടരുന്ന ഊർജ്ജ പങ്കാളിത്തം ഈ കരാറിലൂടെ കൂടുതൽ ശക്തിപ്പെടുകയാണ്. ജപ്പാന്റെ സാമ്പത്തിക വികസനത്തിന് ഖത്തറിന്റെ എൽഎൻജി വലിയ പിന്തുണ നൽകുന്നുവെന്ന് മന്ത്രി അൽ കാബി പറഞ്ഞു.
