ദോഹ: ഖത്തർ സയന്റിഫിക് എക്സലൻസ് അവാർഡിന്റെ (2026-2027) പുതിയ പതിപ്പിലേക്ക് അപേക്ഷിക്കാൻ ആഗ്രഹിക്കുന്നവർക്കായി മന്ത്രാലയം ഒരുക്കുന്ന ഇലക്ട്രോണിക് സംവിധാനത്തെക്കുറിച്ചുള്ള വിശദീകരണ യോഗം ഇന്ന് (ചൊവ്വാഴ്ച, സെപ്റ്റംബർ 15) നടക്കും. വിദ്യാഭ്യാസം, ഉന്നത വിദ്യാഭ്യാസ മന്ത്രാലയ ആസ്ഥാനത്താണ് യോഗം സംഘടിപ്പിക്കുന്നത്.
അവാർഡിന്റെ വിവിധ വിഭാഗങ്ങളിലേക്ക് ഓൺലൈനായി അപേക്ഷിക്കേണ്ട രീതികൾ, നിബന്ധനകൾ, പങ്കെടുക്കുന്നതിനുള്ള തത്ത്വങ്ങൾ എന്നിവ പങ്കാളികൾക്ക് പരിചയപ്പെടുത്തുകയാണ് യോഗത്തിന്റെ പ്രധാന ലക്ഷ്യം.പോർട്ടലിൽ അക്കൗണ്ട് സൃഷ്ടിക്കുന്നത് മുതൽ വ്യക്തിഗത വിവരങ്ങൾ നൽകുന്നതും ആവശ്യമായ രേഖകൾ അപ്ലോഡ് ചെയ്യുന്നതും വരെയുള്ള നടപടികൾ ലളിതമായി യോഗത്തിൽ വിശദീകരിക്കും.അപേക്ഷ സമർപ്പണവുമായി ബന്ധപ്പെട്ട സംശയങ്ങൾക്ക് മന്ത്രാലയ അധികൃതർ മറുപടി നൽകും.
രാജ്യത്തെ യുവ പ്രതിഭകളെയും ഗവേഷകരെയും പ്രോത്സാഹിപ്പിക്കുന്നതിന് നൽകിവരുന്ന അവാർഡിന് കൃത്യമായ മാനദണ്ഡങ്ങളോടെ വേഗത്തിൽ അപേക്ഷിക്കാൻ ഈ വിശദീകരണ യോഗം സഹായിക്കുമെന്ന് വികസന സമിതി വ്യക്തമാക്കി.
