ദോഹ: 2026-27 പുതിയ ഫുട്ബോൾ സീസണിന് മുന്നോടിയായി മധ്യനിര കൂടുതൽ ശക്തമാക്കാൻ സ്പാനിഷ് മിഡ്ഫീൽഡർ ആൽബർട്ട് റാമിസ് ലൂക്കെയെ (Albert Ramis Luque) സ്വന്തമാക്കി ഖത്തർ എസ്സി. മുഐദർ ക്ലബ്ബിൽ നിന്നാണ് താരം ഖത്തർ എസ്സിയിലേക്ക് ചേക്കേറുന്നത്.
ടീമിന്റെ പ്രകടനം കൂടുതൽ മെച്ചപ്പെടുത്താൻ ശേഷിയുള്ള കരുത്തുറ്റ താരങ്ങളെ ഉൾപ്പെടുത്തി ആദ്യ ഇലവൻ ശക്തിപ്പെടുത്തുന്നതിന്റെ ഭാഗമായാണ് ഈ ട്രാൻസ്ഫറെന്ന് ഖത്തർ എസ്സി തങ്ങളുടെ 'എക്സ്' (X) അക്കൗണ്ടിലൂടെ വ്യക്തമാക്കി. എന്നാൽ കരാറിന്റെ തുകയോ കാലയളവോ ക്ലബ്ബ് പുറത്തുവിട്ടിട്ടില്ല.
2025 വേനൽക്കാലത്താണ് ലൂക്കെ മുഐദർ ക്ലബ്ബിൽ എത്തിയത്. തുടർന്നാണ് ഇപ്പോൾ ഖത്തർ എസ്സിയുടെ നിരയിലേക്ക് താരം ബൂട്ട് കെട്ടുന്നത്.
സ്പാനിഷ് പരിശീലകൻ ബർത്തലോമേ മാർക്വസ് ലോപ്പസിന്റെ കീഴിൽ തുടർച്ചയായ രണ്ടാം സീസണിനാണ് ഖത്തർ എസ്സി ഒരുങ്ങുന്നത്. കഴിഞ്ഞ ഖത്തർ സ്റ്റാർസ് ലീഗിൽ ആറാം സ്ഥാനത്ത് ഫിനിഷ് ചെയ്ത ക്ലബ്ബ്, ഇത്തവണ മികച്ച പ്രകടനത്തിലൂടെ പോയിന്റ് പട്ടികയിൽ മുന്നിലെത്താനും ഗൾഫ് ക്ലബ് ചാമ്പ്യൻസ് ലീഗിൽ വൻ മുന്നേറ്റം നടത്താനും ലക്ഷ്യമിട്ടാണ് പുതിയ താരങ്ങളെ നിരയിലെത്തിക്കുന്നത്.
