ദോഹ: ഹോർമുസ് കടലിടുക്കിലെ ഗതാഗതം പുനരാരംഭിച്ചാൽ ഏതാനും ആഴ്ചകൾക്കകം തങ്ങളുടെ എൽ.എൻ.ജി (ദ്രവികൃത പ്രകൃതിവാതകം) പ്ലാന്റുകളുടെ പ്രവർത്തനം പൂർവ്വസ്ഥിതിയിലാക്കാൻ സജ്ജമാണെന്ന് ഖത്തർ ഊർജ്ജ സഹമന്ത്രി സാദ് ഷെരീദ അൽ കഅബി വ്യക്തമാക്കി. എന്നാൽ, മുൻപുണ്ടായ ഇറാൻ ആക്രമണങ്ങളിൽ പ്ലാന്റുകൾക്കുണ്ടായ കനത്ത നാശനഷ്ടങ്ങൾ കാരണം വരുന്ന ഏതാനും വർഷങ്ങളിൽ ഉൽപ്പാദനത്തിൽ പരിമിതികളുണ്ടാകുമെന്ന് അദ്ദേഹം സൂചിപ്പിച്ചു.
അമേരിക്കയ്ക്കും ഓസ്ട്രേലിയയ്ക്കുമൊപ്പം ലോകത്തിലെ ഏറ്റവും വലിയ എൽ.എൻ.ജി കയറ്റുമതി രാജ്യങ്ങളിലൊന്നായ ഖത്തർ, ഈ വർഷം ആദ്യമാണ് എൽ.എൻ.ജി ഉൽപ്പാദനം നിർത്തിവെച്ചത്. ഹോർമുസ് വഴിയുള്ള ഗതാഗതം പൂർണ്ണമായി തടസ്സപ്പെട്ടതും ലോകത്തിലെ ഏറ്റവും വലിയ എൽ.എൻ.ജി കയറ്റുമതി കേന്ദ്രമായ റാസ് ലഫാന് നേരെ ഇറാൻ നടത്തിയ ആക്രമണങ്ങളുമാണ് ഇതിന് കാരണമായത്. ആക്രമണത്തിൽ റാസ് ലഫാന്റെ മൊത്തം ഉൽപ്പാദന ശേഷിയുടെ 17 ശതമാനത്തോളം തകരാറിലായിരുന്നു.
ഹോർമുസിലെ സുരക്ഷാ ഭീഷണികൾ മാറുംവരെ പൂർണ്ണതോതിലുള്ള ഉൽപ്പാദനം പുനഃസ്ഥാപിക്കാൻ സാധിക്കില്ലെങ്കിലും, പാത സുരക്ഷിതമാകുന്നതോടെ ചുരുങ്ങിയ ആഴ്ചകൾക്കുള്ളിൽ പ്ലാന്റുകൾ വീണ്ടും സജ്ജമാക്കാനാണ് ഖത്തർ ലക്ഷ്യമിടുന്നത്.
