റിയാദ്: ഖത്തർ, സൗദി അറേബ്യ രാജ്യങ്ങൾ തമ്മിലുള്ള സുരക്ഷാ പങ്കാളിത്തവും സഹകരണവും കൂടുതൽ ശക്തമാക്കാൻ ധാരണ. റിയാദിൽ ചേർന്ന ഖത്തർ-സൗദി എക്സിക്യൂട്ടീവ് കൗൺസിലിന് കീഴിലുള്ള സംയുക്ത സുരക്ഷാ-സൈനിക സമിതി യോഗത്തിലാണ് ഇരുരാജ്യങ്ങളുടെയും ഉന്നതതല സംഘം സുപ്രധാന വിഷയങ്ങൾ ചർച്ച ചെയ്തത്.
ഖത്തർ ആഭ്യന്തര മന്ത്രിയും ലേഖ്‌വിയ കമാൻഡറുമായ ശൈഖ് ഖലീഫ ബിൻ ഹമദ് ബിൻ ഖലീഫ അൽഥാനിയും സൗദി ആഭ്യന്തര മന്ത്രി അമീർ അബ്ദുൽ അസീസ് ബിൻ സഊദ് ബിൻ നായിഫ് അൽ സഊദും സംയുക്തമായാണ് യോഗത്തിന് അധ്യക്ഷത വഹിച്ചത്.
ഇരുരാജ്യങ്ങളുടെയും പരമോന്നത ഭരണനേതൃത്വങ്ങളുടെ പിന്തുണയോടെയുള്ള സുരക്ഷാ പങ്കാളിത്തത്തിന്റെ കരുത്ത് യോഗത്തിൽ വ്യക്തമാക്കിയതായി ശൈഖ് ഖലീഫ ബിൻ ഹമദ് തൻ്റെ ഔദ്യോഗിക എക്സ് (X) അക്കൗണ്ടിലൂടെ അറിയിച്ചു. ഉഭയകക്ഷി സഹകരണം മെച്ചപ്പെടുത്തുന്നതിനുള്ള വിവിധ അജണ്ടകൾ യോഗത്തിൽ വിശദമായി ചർച്ച ചെയ്തു.
ചർച്ചകൾക്ക് ശേഷം, ഖത്തർ-സൗദി കോർഡിനേഷൻ കൗൺസിലിന് കീഴിലുള്ള സുരക്ഷാ-സൈനിക സമിതിയുടെ നാലാമത് യോഗത്തിന്റെ തീരുമാനങ്ങൾ അടങ്ങിയ മിനിറ്റ്സിൽ ഇരു രാജ്യങ്ങളിലെയും ആഭ്യന്തര മന്ത്രിമാർ ഒപ്പുവെച്ചു.
