ദോഹ: ഖത്തറിന്റെ കായികരംഗത്തെ വൻ മുന്നേറ്റങ്ങളെയും വികസനങ്ങളെയും അന്താരാഷ്ട്ര തലത്തിൽ അടയാളപ്പെടുത്തുന്നതിൽ ഫോട്ടോഗ്രാഫി നിർണ്ണായക പങ്ക് വഹിക്കുന്നുണ്ടെന്ന് ഖത്തർ ഫോട്ടോഗ്രാഫി സെന്റർ ഡയറക്ടർ ജാസിം അഹമ്മദ് അൽ ബുഐനൈൻ. ഓഗസ്റ്റ് 19 ലോക ഫോട്ടോഗ്രാഫി ദിനത്തോട് അനുബന്ധിച്ച് ഖത്തർ ന്യൂസ് ഏജൻസിക്ക് (QNA) നൽകിയ പ്രത്യേക അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
​ഖത്തർ സംസ്‌കാര മന്ത്രാലയത്തിന് കീഴിൽ പ്രവർത്തിക്കുന്ന ഖത്തർ ഫോട്ടോഗ്രാഫി സെന്റർ, രാജ്യത്തിന്റെ സാംസ്‌കാരിക സ്വത്വവും നേട്ടങ്ങളും ദൃശ്യാവിഷ്‌കാരത്തിലൂടെ രേഖപ്പെടുത്താനും പ്രാദേശിക-അന്തർദേശീയ തലങ്ങളിൽ ശ്രദ്ധേയരായ ഒരു കൂട്ടം ഫോട്ടോഗ്രാഫർമാരെ വളർത്തിയെടുക്കാനും നിരന്തരം ശ്രമിച്ചുവരികയാണ്.
​കായിക ഫോട്ടോഗ്രാഫി വെറുമൊരു നിമിഷത്തിന്റെ ചിത്രീകരണമല്ലെന്നും അത് വിജയഗാഥകളും കായിക പോരാട്ടത്തിന്റെ വികാരങ്ങളും പ്രതിഫലിപ്പിക്കുന്ന മാധ്യമമാണെന്നും അൽ ബുഐനൈൻ പറഞ്ഞു. കായിക ഫോട്ടോഗ്രാഫിയെ പ്രോത്സാഹിപ്പിക്കുന്നതിനായി നിരവധി പ്രത്യേക പരിശീലന പരിപാടികൾ കേന്ദ്രം ആവിഷ്കരിച്ചിട്ടുണ്ട്.ഖത്തർ ഫുട്ബോൾ അസോസിയേഷനുമായി സഹകരിച്ച് സംഘടിപ്പിച്ച 'ഫുട്ബോൾ ഫോട്ടോഗ്രാഫർ' (Football Photographer) പരിപാടിയുടെ രണ്ടാം പതിപ്പ് ഏറെ ശ്രദ്ധ നേടി.
​2026 ലോകകപ്പിന്റെ തുടക്കത്തിന് അനുബന്ധമായി 'വേൾഡ് കപ്പ് ലെഗസി' (World Cup Legacy) പ്രദർശനം സംഘടിപ്പിച്ചു. ഖത്തർ ആതിഥേയത്വം വഹിച്ച ലോകകപ്പ് അവശേഷിപ്പിച്ച കായിക പാരമ്പര്യവും നേട്ടങ്ങളും ജനങ്ങളിലേക്ക് എത്തിക്കാൻ ഈ എക്സിബിഷന് സാധിച്ചു.
​ഭാവിയിൽ രാജ്യത്തെ വിവിധ മേഖലകളുമായി സഹകരിച്ച് ഫോട്ടോഗ്രാഫി പരിപാടികൾ കൂടുതൽ വ്യാപിപ്പിക്കാനും യുവ പ്രതിഭകൾക്ക് വിദഗ്ദ്ധ പരിശീലനം നൽകാനും സെന്റർ ലക്ഷ്യമിടുന്നുണ്ട്. ഫോട്ടോഗ്രാഫർ സ്വന്തം കാഴ്ചപ്പാടും വികാരങ്ങളും സന്നിവേശിപ്പിക്കുന്ന കലാപരമായ മാധ്യമമാണെന്നാണ് തന്റെ വ്യക്തിപരമായ നിരീക്ഷണമെന്നും അൽ ബുഐനൈൻ കൂട്ടിച്ചേർത്തു.