ദോഹ: വിദ്യാഭ്യാസ മേഖലയിലെ വിപ്ലവകരമായ നേതൃത്വത്തിനും കമ്മ്യൂണിറ്റി സേവനങ്ങൾക്കുമുള്ള അന്താരാഷ്ട്ര അംഗീകാരമായി ഖത്തർ വിദ്യാഭ്യാസ-ഉന്നത വിദ്യാഭ്യാസ മന്ത്രി ലുൽവ ബിൻത് റാഷിദ് ബിൻ മുഹമ്മദ് അൽ ഖാത്തിറിന് 'അറബ് വുമൺ എക്സലൻസ് ഫോർ സോഷ്യൽ റെസ്‌പോൺസിബിലിറ്റി- 2026' പുരസ്കാരം. ദേശീയ, പ്രാദേശിക, അന്തർദേശീയ തലങ്ങളിൽ വിദ്യാഭ്യാസം പ്രോത്സാഹിപ്പിക്കുന്നതിനും സാമൂഹിക പ്രതിബദ്ധതയുള്ള പ്രവർത്തനങ്ങൾ ഏകോപിപ്പിക്കുന്നതിനും അവർ നൽകിയ മികച്ച സംഭാവനകളെ മുൻനിർത്തിയാണ് ഈ ആദരം.
ഈജിപ്തിലെ ഖത്തർ എംബസിയിലെയും ലീഗ് ഓഫ് അറബ് സ്റ്റേറ്റ്സിലെ ഖത്തറിന്റെ സ്ഥിരം പ്രതിനിധി സംഘത്തിലെയും ഉപദേശകനായ ഖാലിദ് അബ്ദുള്ള അൽ ഇബ്രാഹിം, മന്ത്രിക്ക് വേണ്ടി പുരസ്കാരമായ 'അറബ് വുമൺ എക്സലൻസ് ഷീൽഡ്' ഏറ്റുവാങ്ങി.
അറബ് ലോകത്ത് വിദ്യാഭ്യാസ പുരോഗതിക്കും സ്ത്രീ ശാക്തീകരണത്തിനുമായി ഖത്തർ നടത്തുന്ന മാതൃകാപരമായ പ്രവർത്തനങ്ങൾക്കുള്ള വീണ്ടുമൊരു അംഗീകാരമായാണ് ഈ പുരസ്കാരം വിലയിരുത്തപ്പെടുന്നത്.
