ദോഹ: ഖത്തറിന്റെ ദേശീയ പേയ്മെന്റ് കാർഡായ ‘ഹിമ്യാൻ’ (Hemyan) ഇനി മുതൽ ബഹ്റൈനിലും ഉപയോഗിക്കാമെന്ന് ഖത്തർ സെൻട്രൽ ബാങ്ക് (QCB) അറിയിച്ചു. ധനകാര്യ മേഖലയുടെ മൂന്നാമത് തന്ത്രപരമായ പദ്ധതികളുടെ (Third Strategy of the Financial Sector) ഭാഗമായാണ് ഈ പുതിയ നടപടി. ഡിജിറ്റൽ പേയ്മെന്റ് സംവിധാനങ്ങളും സേവനങ്ങളും വികസിപ്പിക്കുന്നതിനും ഗൾഫ് സഹകരണ കൗൺസിൽ (GCC) രാജ്യങ്ങൾ തമ്മിലുള്ള സഹകരണം കൂടുതൽ ശക്തമാക്കുന്നതിനുമുള്ള ശ്രമങ്ങളുടെ തുടർച്ചയായാണ് ഈ സുപ്രധാന തീരുമാനം.
ഇതുവഴി ‘ഹിമ്യാൻ’ കാർഡ് ഉടമകൾക്ക് ബഹ്റൈനിലെ വിവിധ എ.ടി.എമ്മുകളിൽ (ATM) നിന്നും പണം പിൻവലിക്കുന്നതിനും, വിവിധ വില്പനശാലകളിൽ (Points of Sale) പണമിടപാടുകൾ നടത്തുന്നതിനും സാധിക്കുമെന്ന് ഖത്തർ സെൻട്രൽ ബാങ്ക് തങ്ങളുടെ ഔദ്യോഗിക 'എക്സ്' (X) ഹാൻഡിലിലൂടെ വ്യക്തമാക്കി. ഏറ്റവും ഉയർന്ന സുരക്ഷാ-സംരക്ഷണ മാനദണ്ഡങ്ങൾ ഉറപ്പാക്കിക്കൊണ്ടായിരിക്കും ഈ സേവനം ലഭ്യമാക്കുക.
ഖത്തർ എയർവേയ്സിന്റെ പ്രത്യേക ആനുകൂല്യങ്ങൾ ഉൾപ്പെടെയുള്ളവ ലഭ്യമാകുന്ന കാർഡാണ് ഖത്തറിന്റെ തദ്ദേശീയ പേയ്മെന്റ് നെറ്റ്വർക്കായ 'ഹിമ്യാൻ'.
