പി വി എ നാസർ
ദോഹ: മേഖലയിലെ രാഷ്ട്രീയ സാഹചര്യങ്ങൾ വിപണിയെ ബാധിക്കുമെന്ന ആശങ്കകൾ അപ്രസക്തമാക്കി ഖത്തറിലെ സ്വർണ്ണവ്യാപാര മേഖലയിൽ വൻ കുതിച്ചുചാട്ടം. ഈദുൽ ഫിത്തർ പ്രമാണിച്ച് പ്രാദേശിക വിപണിയിൽ സ്വർണ്ണത്തിന് 20 ശതമാനത്തോളം ഡിമാൻഡ് വർദ്ധിച്ചതായി പ്രമുഖ വ്യാപാരികൾ വെളിപ്പെടുത്തി. വിലയിലുണ്ടായ വർദ്ധനവ് വകവെക്കാതെയാണ് ഉപഭോക്താക്കൾ സ്വർണ്ണാഭരണങ്ങളിലേക്ക് ആകൃഷ്ടരാകുന്നത്.
കുടുംബബന്ധങ്ങൾ ദൃഢമാക്കുന്നതിന്റെ ഭാഗമായി വിലപിടിപ്പുള്ള സമ്മാനങ്ങൾ നൽകുന്ന ആചാരം വിപണിക്ക് കരുത്തേകുന്നു. ഇതിൽ ഏറ്റവും മുൻപന്തിയിൽ നിൽക്കുന്നത് സ്വർണ്ണാഭരണങ്ങൾ തന്നെയാണ്.സ്വദേശികൾക്കിടയിൽ പാരമ്പര്യ ശൈലിയിലുള്ള ആഭരണങ്ങൾക്കാണ് പ്രിയം. വിശേഷിച്ചും 'തമീം ചെയർ' (Tamim chairs), 'ജാബർ ചെയർ' (Jaber chairs) തുടങ്ങിയ പരമ്പരാഗത ഡിസൈനുകൾ വിപണിയിൽ തരംഗമാകുന്നു.നിലവിൽ 18 കാരറ്റ് സ്വർണ്ണത്തിന് ഗ്രാമിന് 395 ഖത്തർ റിയാലിലധികമാണ് വില. 21 കാരറ്റിന് ഏകദേശം 460 റിയാലും, 24 കാരറ്റിന് 526 റിയാലുമാണ് വിപണി നിരക്ക്.കുവൈറ്റ്, ഒമാൻ തുടങ്ങിയ രാജ്യങ്ങളിൽ നിന്നുള്ള ഇറക്കുമതിക്കൊപ്പം ഖത്തറിലെ പ്രാദേശിക നിർമ്മാണ മേഖലയും വലിയ വളർച്ച കൈവരിച്ചിട്ടുണ്ട്. കഴിഞ്ഞ അഞ്ച് വർഷത്തിനിടെ ഗുണനിലവാരത്തിലും അളവിലും ഖത്തറി സ്വർണ്ണാഭരണങ്ങൾ ആഗോള നിലവാരത്തിലേക്ക് ഉയർന്നു.
പ്രാദേശിക ഉല്പാദകരുടെ കഠിനാധ്വാനവും മികച്ച ക്രാഫ്റ്റ്‌സ്മാൻഷിപ്പും വിപണിയിലെ ഈ മുന്നേറ്റത്തിന് പ്രധാന കാരണമാണെന്ന് വ്യാപാരികൾ വിലയിരുത്തുന്നു. വരും ദിവസങ്ങളിലും വിപണിയിൽ ഇതേ ഉണർവ് തുടരുമെന്നാണ് പ്രതീക്ഷ.
