ദോഹ: ഖത്തറിൽ കാലാവധി കഴിഞ്ഞതോ ഉടൻ അവസാനിക്കുന്നതോ ആയ എല്ലാത്തരം എൻട്രി വിസകളും നീട്ടിനൽകുന്നതിനുള്ള പ്രത്യേക ഇളവ് ജൂൺ 7 ഞായറാഴ്ചയോടെ അവസാനിക്കുമെന്ന് ആഭ്യന്തര മന്ത്രാലയം അറിയിച്ചു. നാളെ മുതൽ വിസകളുമായി ബന്ധപ്പെട്ട മുൻപത്തെ സാധാരണ നടപടിക്രമങ്ങളും നിയന്ത്രണങ്ങളും പുനരാരംഭിക്കും.
വിസകളുടെ കാലാവധി നീട്ടിനൽകുന്നത് സംബന്ധിച്ച് ഇക്കഴിഞ്ഞ മാർച്ച് 3-ന് പുറപ്പെടുവിച്ച പത്രക്കുറിപ്പിന്റെ അടിസ്ഥാനത്തിലാണ്, ഈ ഇളവ് നാളെ മുതൽ നിർത്തലാക്കുന്നതായി മേയ് 28-ന് ആഭ്യന്തര മന്ത്രാലയം വ്യക്തമാക്കിയത്.
ഞായറാഴ്ച മുതൽ ഓരോ വിസയ്ക്കും നിശ്ചയിച്ചിട്ടുള്ള യഥാർത്ഥ കാലാവധിയും ഫീസും ഉൾപ്പെടെയുള്ള അംഗീകൃത മാനദണ്ഡങ്ങൾ വീണ്ടും പ്രാബല്യത്തിൽ വരും.
രാജ്യത്തുള്ള എല്ലാ പ്രവാസികളും സന്ദർശകരും മറ്റ് ബന്ധപ്പെട്ടവരും തങ്ങളുടെ നിയമപരമായ പദവി (Legal Status) ഉറപ്പുവരുത്തണമെന്ന് മന്ത്രാലയം ഔദ്യോഗിക 'X' (ട്വിറ്റർ) ഹാൻഡിലിലൂടെ അറിയിച്ചു. നിശ്ചിത സമയപരിധിക്കുള്ളിൽ വിസകൾ പുതുക്കുകയോ, നിശ്ചിത ഫീസ് അടയ്ക്കുകയോ, അല്ലെങ്കിൽ വിസ കാലാവധി കഴിഞ്ഞവർ രാജ്യം വിടുകയോ ചെയ്യണം. അനുവദനീയമായ താമസപരിധി ലംഘിക്കുന്നത് വഴിയുണ്ടാകുന്ന നിയമനടപടികളും പിഴകളും ഒഴിവാക്കാൻ എല്ലാവരും ജാഗ്രത പാലിക്കണമെന്ന് ആഭ്യന്തര മന്ത്രാലയം അഭ്യർത്ഥിച്ചു.
