
ബേൺ: സ്വിസ് കോൺഫെഡറേഷൻ പ്രസിഡന്റ് ഗൈ പാർമെലിൻ ഒരുക്കിയ പ്രഭാതഭക്ഷണ (വർക്കിംഗ് ബ്രേക്ക്ഫാസ്റ്റ്) വിരുന്നിൽ ഖത്തർ അമീർ ശൈഖ് തമീം ബിൻ ഹമദ് ആൽഥാനി പങ്കെടുത്തു. ബേണിലെ അമീറിന്റെ വസതിയിൽ നടന്ന ചടങ്ങിൽ ഇരുരാജ്യങ്ങളിലെയും പ്രമുഖ വ്യവസായികളും കമ്പനി മേധാവികളും സംബന്ധിച്ചു.
ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിനെക്കുറിച്ചും വ്യാപാര-നിക്ഷേപ സഹകരണം വിപുലീകരിക്കുന്നതിനുള്ള സാധ്യതകളെക്കുറിച്ചും കൂടിക്കാഴ്ചയിൽ ചർച്ചയായി. പൊതുതാൽപ്പര്യമുള്ള മേഖലകളിൽ പങ്കാളിത്തം സ്ഥാപിക്കുന്നതിൽ സാമ്പത്തിക മേഖലയ്ക്കുള്ള പങ്കിനെക്കുറിച്ചും നേതാക്കളും വ്യവസായികളും അഭിപ്രായങ്ങൾ കൈമാറി.
ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിൻ അബ്ദുറഹ്മാൻ ബിൻ ജാസിം ആൽഥാനിയും അമീറിനെ അനുഗമിക്കുന്ന ഔദ്യോഗിക പ്രതിനിധി സംഘത്തിലെ മറ്റ് പ്രമുഖരും ചടങ്ങിൽ സന്നിഹിതരായിരുന്നു. സ്വിസ് പക്ഷത്തുനിന്ന് നിരവധി മുതിർന്ന ഉദ്യോഗസ്ഥരും വിരുന്നിൽ പങ്കെടുത്തു.










