ദോഹ: ഖത്തർ സ്റ്റോക്ക് എക്‌സ്‌ചേഞ്ചിൽ ലിസ്റ്റ് ചെയ്തിട്ടുള്ള എട്ട് പ്രമുഖ ഖത്തരി ബാങ്കുകളുടെ ദീർഘകാല ക്രെഡിറ്റ് റേറ്റിങ് അന്താരാഷ്ട്ര റേറ്റിങ് ഏജൻസിയായ 'മൂഡീസ്' (Moody's) നിലനിർത്തി. ബാങ്കുകളുടെ ഭാവി സാമ്പത്തിക അന്തരീക്ഷം സുരക്ഷിതമാണെന്ന് വിലയിരുത്തി 'സ്റ്റേബിൾ' ഔട്ട്ലുക്കും ഏജൻസി സ്ഥിരീകരിച്ചിട്ടുണ്ട്.
ശക്തമായ മൂലധന അടിത്തറ, മികച്ച ലിക്വിഡിറ്റി (ദ്രവ്യത), നിയമാനുസൃതമായ പരിധിയേക്കാൾ ഉയർന്ന ക്യാപിറ്റൽ അഡീക്വസി അനുപാതം എന്നിവ ഖത്തരി ബാങ്കുകൾക്കുണ്ടെന്ന് മൂഡീസ് ചൂണ്ടിക്കാട്ടി. ഇത് ആഗോള സാമ്പത്തിക പ്രതിസന്ധികളെയും ഭൗമരാഷ്ട്രീയ സംഘർഷങ്ങളെയും (Geopolitical Tensions) പ്രതിരോധിക്കാൻ ബാങ്കുകളെ പ്രാപ്തമാക്കുന്നതായി സി.എൻ.ബി.സി റിപ്പോർട്ട് ചെയ്തു.
ഖത്തർ സമ്പദ്‌വ്യവസ്ഥയുടെ കരുത്താണ് ബാങ്കിങ് മേഖലയുടെ ഈ സുസ്ഥിരതയ്ക്ക് ആധാരമെന്ന് ഏജൻസി വ്യക്തമാക്കി. ഖത്തറിന്റെ ഉയർന്ന പരമാധികാര റേറ്റിങ്ങും (Aa2 Rating - Stable Outlook), ഖത്തർ ഇൻവെസ്റ്റ്‌മെന്റ് അതോറിറ്റിയുടെ (QIA) ഭീമമായ ആസ്തിയും, രാജ്യത്തെ വൻതോതിലുള്ള എണ്ണ-വാതക നിക്ഷേപവുമാണ് ബാങ്കിങ് മേഖലയ്ക്ക് ശക്തമായ പിന്തുണ നൽകുന്നത്.
