മക്ക/ദോഹ: ഈ വർഷത്തെ ഹജ്ജ് സീസൺ ഖത്തറിൽ നിന്നുള്ള തീർഥാടകർക്ക് സുരക്ഷിതവും സുഗമവുമാക്കുന്നതിനുള്ള ഒരുക്കങ്ങൾ വിലയിരുത്താൻ ഔഖാഫ്-ഇസ്‌ലാമിക കാര്യ മന്ത്രിയും ഖത്തർ ഹജ്ജ് മിഷൻ മേധാവിയുമായ ഗാനിം ബിൻ ഷഹീൻ അൽ ഗാനിം ഹജ്ജ് ക്യാമ്പയിൻ അസോസിയേഷൻ ഭാരവാഹികളുമായി മക്കയിൽ കൂടിക്കാഴ്ച നടത്തി. മിനായിലും അറഫയിലും മുസ്ദലിഫയിലുമുള്ള ഖത്തരി തീർഥാടകർക്കായുള്ള ടെന്റുകളും മറ്റ് അടിസ്ഥാന സൗകര്യങ്ങളും പൂർണ്ണ സജ്ജമാണെന്ന് മന്ത്രി അറിയിച്ചു.
രാജ്യത്തെ ഭരണനേതൃത്വത്തിന്റെ പ്രത്യേക നിർദ്ദേശപ്രകാരം തീർഥാടകരുടെ സുരക്ഷയ്ക്കും സൗകര്യങ്ങൾക്കുമാണ് ഖത്തർ ഹജ്ജ് മിഷൻ പ്രഥമ പരിഗണന നൽകുന്നതെന്ന് മന്ത്രി കൂടിക്കാഴ്ചയിൽ വ്യക്തമാക്കി. ദുൽഹിജ്ജ എട്ടിന് ഹജ്ജ് കർമ്മങ്ങൾ ആരംഭിക്കുന്നതിന് മുൻപായി എല്ലാ സർവീസ് ഗ്രൂപ്പുകളും തങ്ങളുടെ ഒരുക്കങ്ങൾ പൂർത്തിയാക്കിയതായി ഉറപ്പുവരുത്തിയിട്ടുണ്ട്.സൗദി അറേബ്യയിലെ ബന്ധപ്പെട്ട മന്ത്രാലയങ്ങളുമായി ചേർന്നുള്ള സംയോജിത പ്ലാൻ പ്രകാരമാണ് ഖത്തർ ഹജ്ജ് മിഷൻ പ്രവർത്തിക്കുന്നത്. മെഡിക്കൽ, ലോജിസ്റ്റിക്സ്, മതപരമായ മാർഗ്ഗനിർദ്ദേശങ്ങൾ എന്നിവയ്ക്കായി വിപുലമായ സംവിധാനങ്ങൾ ഒരുക്കിയിട്ടുണ്ട്.ഹജ്ജ് മിഷനിലെ വിവിധ വിംഗുകളും ക്യാമ്പയിൻ നടത്തുന്നവരും ഒരു ടീമായി പ്രവർത്തിക്കണമെന്ന് മന്ത്രി ആവശ്യപ്പെട്ടു. യാത്രക്കാരുടെ രജിസ്ട്രേഷൻ മുതൽ കർമ്മങ്ങൾ പൂർത്തിയാക്കി നാട്ടിലേക്ക് മടങ്ങുന്നത് വരെയുള്ള എല്ലാ ഘട്ടങ്ങളിലും കൃത്യമായ ഏകോപനം ഉണ്ടാകും.ഇരു ഹറമുകളുടെയും സൂക്ഷിപ്പുകാരനായ സൽമാൻ രാജാവിനും സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ രാജകുമാരനും തീർഥാടകർക്കായി ഒരുക്കുന്ന ആധുനിക സജ്ജീകരണങ്ങൾക്ക് മന്ത്രി നന്ദി അറിയിച്ചു. സൗദി ഹജ്ജ്-ഉംറ മന്ത്രാലയവുമായുള്ള മികച്ച സഹകരണം ഇരുരാജ്യങ്ങളും തമ്മിലുള്ള ശക്തമായ ബന്ധത്തിന്റെ തെളിവാണെന്നും അദ്ദേഹം കൂട്ടിച്ചേർത്തു.
കൂടിക്കാഴ്ചയിൽ ഖത്തരി തീർഥാടകരുടെ ക്യാമ്പയിൻ ഭാരവാഹികൾ തങ്ങളുടെ നിർദ്ദേശങ്ങളും അഭിപ്രായങ്ങളും മന്ത്രിയെ അറിയിച്ചു. തീർഥാടകർക്ക് നേരിടേണ്ടി വരുന്ന ഏത് തടസ്സങ്ങളും അടിയന്തിരമായി പരിഹരിക്കാൻ ബന്ധപ്പെട്ട ഉദ്യോഗസ്ഥർക്ക് മന്ത്രി നിർദ്ദേശം നൽകി.
