ദോഹ:ഇറാൻ ഖത്തറിന് നേരെ നടത്തുന്ന തുടർച്ചയായ ആക്രമണങ്ങളെക്കുറിച്ച് ഐക്യരാഷ്ട്രസഭയ്ക്കും (UN) സുരക്ഷാ കൗൺസിലിനും ഖത്തർ 14-ാമത് ഔദ്യോഗിക കത്തയച്ചു. രാജ്യത്തിൻ്റെ പരമാധികാരത്തിന് മേലുള്ള കടന്നുകയറ്റവും പ്രാദേശിക സുരക്ഷയ്ക്കുള്ള ഭീഷണിയുമായി ഇതിനെ ഖത്തർ വിശേഷിപ്പിച്ചു.
​യുഎന്നിലെ ഖത്തറിൻ്റെ സ്ഥിരം പ്രതിനിധി ഷെയ്ഖ ആലിയ അഹമ്മദ് ബിൻ സെയ്ഫ് അൽ താനിയാണ് കത്ത് കൈമാറിയത്.2026 ഏപ്രിൽ 8 ബുധനാഴ്ച ഇറാനിൽ നിന്ന് ഏഴ് ബാലിസ്റ്റിക് മിസൈലുകളും നിരവധി ഡ്രോണുകളും ഉപയോഗിച്ച് ഖത്തറിന് നേരെ ആക്രമണമുണ്ടായി. ഖത്തർ സായുധ സേന ഇവ വിജയകരമായി തടഞ്ഞുവെന്ന് പ്രതിരോധ മന്ത്രാലയം അറിയിച്ചു.ഇറാൻ്റെ ആക്രമണങ്ങളെ അപലപിക്കുകയും അവ ഉടൻ അവസാനിപ്പിക്കാൻ ആവശ്യപ്പെടുകയും ചെയ്യുന്ന സെക്യൂരിറ്റി കൗൺസിൽ പ്രമേയം (2817/2026) നിലനിൽക്കെയാണ് വീണ്ടും ലംഘനമുണ്ടായിരിക്കുന്നത്.ഇറാൻ ലക്ഷ്യം വെക്കുന്നത് പൂർണ്ണമായും സിവിലിയൻ കേന്ദ്രങ്ങളെയാണെന്ന് കത്തിൽ ചൂണ്ടിക്കാട്ടി. ഇത് 1949-ലെ ജനീവ കൺവെൻഷനുകളുടെയും അന്താരാഷ്ട്ര മാനുഷിക നിയമങ്ങളുടെയും നഗ്നമായ ലംഘനമാണ്.
യുഎൻ ചാർട്ടറിലെ ആർട്ടിക്കിൾ 51 പ്രകാരം ഖത്തറിന് സ്വയം പ്രതിരോധിക്കാനുള്ള അവകാശമുണ്ടെന്ന് കത്തിൽ ആവർത്തിച്ചു. രാജ്യത്തിൻ്റെ സുരക്ഷയ്ക്കും പൗരന്മാരുടെ സംരക്ഷണത്തിനുമായി ഏത് നടപടിയും സ്വീകരിക്കാൻ ഖത്തർ മടിക്കില്ലെന്നും കത്തിൽ വ്യക്തമാക്കി.അന്താരാഷ്ട്ര സമാധാനവും സുരക്ഷയും നിലനിർത്താൻ സുരക്ഷാ കൗൺസിൽ ഉത്തരവാദിത്തം ഏറ്റെടുക്കണമെന്നും, ഇത്തരം ഗുരുതരമായ ലംഘനങ്ങൾ അവസാനിപ്പിക്കാൻ ആവശ്യമായ നടപടികൾ സ്വീകരിക്കണമെന്നും ഖത്തർ ആവശ്യപ്പെട്ടു.
​ആക്രമണങ്ങൾ മൂലമുണ്ടായ നാശനഷ്ടങ്ങൾ വിലയിരുത്തി വരികയാണെന്നും, ഇതുസംബന്ധിച്ച വിവരങ്ങൾ യുഎന്നിനെ കൃത്യമായി അറിയിക്കുമെന്നും ഖത്തർ വ്യക്തമാക്കി. ഈ കത്ത് സെക്യൂരിറ്റി കൗൺസിലിൻ്റെ ഔദ്യോഗിക രേഖയായി പ്രസിദ്ധീകരിക്കാനും ഖത്തർ ആവശ്യപ്പെട്ടിട്ടുണ്ട്.