ദോഹ: ഇന്ത്യയിൽ നടപ്പിലാക്കാൻ ഉദ്ദേശിക്കുന്ന 10 ശതകോടി ഡോളറിന്റെ നിക്ഷേപ പദ്ധതികളെക്കുറിച്ചും ഉഭയകക്ഷി നിക്ഷേപ കരാറിന് അന്തിമരൂപം നൽകുന്നതിനെക്കുറിച്ചും കേന്ദ്ര ധനമന്ത്രി നിർമ്മല സീതാരാമൻ ഖത്തർ ധനമന്ത്രി അലി ബിൻ അഹമ്മദ് അൽ കുവാരിയുമായി കൂടിക്കാഴ്ച നടത്തി. ദോഹയിൽ നടക്കുന്ന ഏഷ്യൻ ഇൻഫ്രാസ്ട്രക്ചർ ഇൻവെസ്റ്റ്‌മെന്റ് ബാങ്കിന്റെ (AIIB) 11-ാമത് വാർഷിക യോഗത്തിനിടെയായിരുന്നു ഈ സുപ്രധാന ചർച്ച.
​ഇന്ത്യയുടെ യു.പി.ഐ (UPI) ഡിജിറ്റൽ പേയ്മെന്റ് സേവനങ്ങൾ ഖത്തറിലുടനീളം വ്യാപിപ്പിക്കുന്നതും, ഇന്ത്യയുടെ നാഷണൽ ഇൻഫ്രാസ്ട്രക്ചർ ആൻഡ് ഇൻവെസ്റ്റ്‌മെന്റ് ഫണ്ടുമായുള്ള (NIIF) ഖത്തറിന്റെ സഹകരണവും യോഗത്തിൽ വിഷയമായി. വ്യാപാര-നിക്ഷേപ മേഖലകളിലെ സഹകരണം കൂടുതൽ ശക്തമാക്കുന്നതിനായി ഇരട്ട നികുതി ഒഴിവാക്കൽ കരാറിനെക്കുറിച്ചും (DTAA) ഇരു നേതാക്കളും സംസാരിച്ചു.
​സന്ദർശനവേളയിൽ ഖത്തറിലെ ഇന്ത്യൻ സമൂഹത്തിന്റെ മികച്ച സേവനങ്ങളെ ഖത്തർ ധനമന്ത്രി അഭിനന്ദിച്ചു. AIIB-യിലെ രണ്ടാമത്തെ വലിയ ഓഹരിയുടമ എന്ന നിലയിൽ ഇന്ത്യയെ പ്രതിനിധീകരിച്ചാണ് കേന്ദ്ര ധനമന്ത്രി മൂന്ന് ദിവസത്തെ സന്ദർശനത്തിനായി ഖത്തറിലെത്തിയത്. സമ്മേളനത്തിനിടെ സ്വിറ്റ്‌സർലൻഡ്, അൾജീരിയ, സൗദി അറേബ്യ, നേപ്പാൾ തുടങ്ങിയ രാജ്യങ്ങളിലെ ധനമന്ത്രിമാരുമായും AIIB പ്രസിഡന്റുമായും അവർ ഉഭയകക്ഷി ചർച്ചകൾ നടത്തി.
ഖത്തർ സന്ദർശനത്തിനിടെ ഖത്തറി ബിസിനസ്സ്മെൻ അസോസിയേഷൻ (QBA) സംഘടിപ്പിച്ച റൗണ്ട് ടേബിൾ സമ്മേളനത്തിൽ കേന്ദ്ര ധനമന്ത്രി നിർമ്മല സീതാരാമൻ പങ്കെടുത്തു.  ഇന്ത്യയിലെ വ്യവസായ-വ്യാപാര മേഖലകളിൽ സജീവമായി പങ്കാളികളാകാൻ ഖത്തറിലെ പ്രമുഖ വ്യവസായികളെ കേന്ദ്ര ധനമന്ത്രി ക്ഷണിച്ചു.