ദോഹ: റമദാൻ 27-ാം രാവിൽ ഖത്തർ റെഡ് ക്രസന്റ് സംഘടിപ്പിച്ച 'ഖത്തർ ഒറ്റക്കെട്ട്' എന്ന ജീവകാരുണ്യ ക്യാമ്പയിനിലൂടെ 167 ദശലക്ഷം റിയാൽ സമാഹരിച്ചു. രാജ്യത്തിനകത്തും പുറത്തുമുള്ള ദുരിതമനുഭവിക്കുന്നവർക്കായി ഈ തുക വിനിയോഗിക്കുമെന്ന് ഖത്തർ റെഡ് ക്രസന്റ് മീഡിയ വിഭാഗം മേധാവി റാനിയ അൽ ബർദിനി അറിയിച്ചു.ആകെ ലഭിച്ച തുകയിൽ 23 ദശലക്ഷം റിയാൽ ഖത്തറിനുള്ളിലെ നിർദ്ധന കുടുംബങ്ങൾക്കും കടബാധ്യത മൂലം പ്രയാസപ്പെടുന്നവർക്കുമായി (Debtors) മാറ്റിവെച്ചു.144 ദശലക്ഷം റിയാൽ ലോകത്തെ 15 രാജ്യങ്ങളിലായി നടപ്പിലാക്കുന്ന വിവിധ പദ്ധതികൾക്കായി വിനിയോഗിക്കും.പ്രമുഖ പണ്ഡിതന്മാർ, മതപ്രഭാഷകർ, മാധ്യമപ്രവർത്തകർ എന്നിവരുടെ പങ്കാളിത്തത്തോടെ ഖത്തർ ടിവി വഴി സംപ്രേക്ഷണം ചെയ്ത ഈ ക്യാമ്പയിൻ റെഡ് ക്രസന്റിന്റെ ചരിത്രത്തിലെ ഏറ്റവും വിജയകരമായ ഒന്നാണെന്ന് അധികൃതർ വ്യക്തമാക്കി.
ഖത്തറിലെ ജനങ്ങളുടെ ഉദാരമനസ്കതയാണ് ഈ വലിയ നേട്ടത്തിന് പിന്നിലെന്ന് റെഡ് ക്രസന്റ് അറിയിച്ചു.
