ദോഹ: വിമാന, കപ്പൽ മാർഗ്ഗങ്ങളിലൂടെയുള്ള ചരക്കുകളുടെ (ആകാശ-സമുദ്ര ചരക്ക് ഇറക്കുമതി) അതിവേഗ പരിശോധനയിലും ക്ലിയറൻസിലും പശ്ചിമേഷ്യൻ മേഖലയിൽ ഒന്നാം സ്ഥാനം സ്വന്തമാക്കി ഖത്തർ. ലോകബാങ്കിന്റെ ഏറ്റവും പുതിയ ലോജിസ്റ്റിക്സ് പെർഫോമൻസ് ഇൻഡക്സ് (LPI 2.0) റിപ്പോർട്ടിലാണ് ഖത്തറിന്റെ ഈ ചരിത്ര നേട്ടം.നേരിട്ടുള്ള വിമാന-പോസ്റ്റൽ ഗതാഗത കണക്റ്റിവിറ്റിയുടെ കാര്യത്തിൽ മേഖലയിലെ ആദ്യ മൂന്ന് രാജ്യങ്ങളിൽ ഒന്നായി ഖത്തർ ഇടംപിടിച്ചു.ചരക്കുകൾ തുറമുഖങ്ങളിലും വിമാനത്താവളങ്ങളിലും കിടക്കുന്ന സമയം (Dwell Time) കുറയ്ക്കാനും, പ്രവർത്തനച്ചെലവുകൾ ലാഭിക്കാനും ഈ നേട്ടം സഹായിക്കും.സാമ്പ്രദായിക സർവേകൾക്ക് പകരം പ്രായോഗിക പ്രവർത്തന ഡാറ്റകളെ (Operational Data) ആധാരമാക്കിയാണ് ലോകബാങ്ക് ഇത്തവണത്തെ സൂചിക തയ്യാറാക്കിയത്.
ആഗോള വ്യാപാര-ലോജിസ്റ്റിക്സ് ഹബ്ബെന്ന നിലയിൽ രാജ്യത്തിന്റെ പദവി കൂടുതൽ ദൃഢമാക്കാനും, അന്താരാഷ്ട്ര നിക്ഷേപകരെ ഖത്തറിലേക്ക് ആകർഷിക്കാനും ഈ പുരോഗതി വഴിതുറക്കുമെന്ന് നാഷണൽ പ്ലാനിംഗ് കൗൺസിൽ വ്യക്തമാക്കി. ഹമദ് അന്താരാഷ്ട്ര വിമാനത്താവളത്തിന്റെയും ഹമദ് പോർട്ടിന്റെയും അത്യാധുനിക അടിസ്ഥാന സൗകര്യങ്ങളാണ് ഈ തിളക്കമാർന്ന നേട്ടത്തിന് അടിത്തറയായത്.
