​ദോഹ: ലോകത്തിലെ ഏറ്റവും മികച്ച ഭരണനിർവഹണ മികവുള്ള (Administrative Efficiency) രാജ്യങ്ങളുടെ പട്ടികയിൽ ഖത്തർ ആഗോളതലത്തിൽ ഒന്നാം സ്ഥാനത്ത്. ആഗോള ബ്യൂറോക്രസി സൂചികയിൽ (Global Bureaucracy Index) നടപടിക്രമങ്ങളിലെ വ്യക്തതയിലും സേവനങ്ങളുടെ വേഗതയിലും ഖത്തർ ഒന്നാമതെത്തിയതായി നാഷണൽ പ്ലാനിംഗ് കൗൺസിൽ അറിയിച്ചു. പ്രമുഖ അന്താരാഷ്ട്ര കൺസൾട്ടൻസി കമ്പനിയായ 'ആപ്കോ' (APCO), 'ഹൊറൈസൺ' (Horizon) ഗ്രൂപ്പുമായി സഹകരിച്ച് തയ്യാറാക്കിയ റിപ്പോർട്ടിലാണ് ഖത്തറിന്റെ ഈ ചരിത്ര നേട്ടം.
​വിവിധ ഇനങ്ങളിലായി രാജ്യം കൈവരിച്ച ഉയർന്ന ശതമാനക്കണക്കുകൾ ഖത്തറിന്റെ ഭരണരംഗത്തെ ഡിജിറ്റൽ പരിവർത്തനത്തിന്റെയും പുരോഗതിയുടെയും തെളിവാണ്.പൊതുജനങ്ങൾക്ക് സർക്കാർ സേവനങ്ങൾ എത്രത്തോളം എളുപ്പത്തിൽ പ്രാപ്യമാകുന്നു എന്ന സൂചികയിൽ (Ease of Access to Services Index) വ്യക്തിഗത വിഭാഗത്തിൽ പ്രാദേശിക തലത്തിൽ (റീജിയണൽ) ഒന്നാം സ്ഥാനവും ആഗോളതലത്തിൽ മൂന്നാം സ്ഥാനവും ഖത്തർ സ്വന്തമാക്കി. 73.1 ശതമാനമാണ് ഈ വിഭാഗത്തിൽ രാജ്യം നേടിയത്.
​"സർക്കാർ സേവനങ്ങൾ കൂടുതൽ ജനകീയവും സുതാര്യവുമാക്കാൻ രാജ്യം നടപ്പിലാക്കിയ ദീർഘവീക്ഷണത്തോടെയുള്ള പദ്ധതികളുടെ ഫലമാണിത്. കുറഞ്ഞ സമയത്തിനുള്ളിൽ, സുതാര്യമായ രീതിയിൽ പൊതുജനങ്ങൾക്ക് സേവനങ്ങൾ വിരൽത്തുമ്പിൽ ലഭ്യമാക്കാൻ ഖത്തറിന് സാധിക്കുന്നുണ്ട്."
– നാഷണൽ പ്ലാനിംഗ് കൗൺസിൽ പ്രസ്താവനയിൽ വ്യക്തമാക്കി.
​ഡിജിറ്റൽ ഗവേണൻസ് സംവിധാനങ്ങൾ ശക്തമാക്കിയതും സ്മാർട്ട് ആപ്ലിക്കേഷനുകൾ വഴിയുള്ള ഏകീകൃത സേവനങ്ങളുമാണ് ഖത്തറിലെ ബ്യൂറോക്രസിയെ കൂടുതൽ ജനസൗഹൃദമാക്കാൻ സഹായിച്ചതെന്ന് റിപ്പോർട്ടുകൾ വ്യക്തമാക്കുന്നു.