​ദോഹ: സംഗീതത്തെ ജനകീയമാക്കുന്നതിനും സമൂഹത്തിന്റെ വിവിധ തലങ്ങളിലുള്ളവർക്ക് ലോകോത്തര ഓർക്കസ്ട്ര അനുഭവം ലഭ്യമാക്കുന്നതിനുമായി ഖത്തർ ഫിൽഹാർമോണിക് ഓർക്കസ്ട്ര (QPO) തങ്ങളുടെ 'നാഷണൽ കമ്മ്യൂണിറ്റി എൻഗേജ്‌മെന്റ് പ്രോഗ്രാം 2026' പ്രഖ്യാപിച്ചു. സ്കൂളുകൾ, ആശുപത്രികൾ, മറ്റ് സാമൂഹിക സ്ഥാപനങ്ങൾ എന്നിവ കേന്ദ്രീകരിച്ച് വിപുലമായ പരിപാടികളാണ് ഈ പദ്ധതിയിലൂടെ ലക്ഷ്യമിടുന്നത്.
​ദോഹയിലെ ഹാമിൽട്ടൺ ഇന്റർനാഷണൽ സ്കൂളിൽ ക്യു.പി.ഒ ബ്രാസ് എൻസെംബിൾ (Brass Ensemble) നടത്തിയ മൂന്ന് സെഷനുകളോടെയാണ് ഈ വർഷത്തെ പരിപാടികൾക്ക് ഔദ്യോഗിക തുടക്കമായത്. നിലവിലെ പ്രാദേശിക സാഹചര്യങ്ങളിൽ ജനങ്ങളുടെ മാനസിക ഉല്ലാസത്തിനും വൈകാരിക സൗഖ്യത്തിനും സംഗീതത്തിലൂടെ കൈത്താങ്ങാകുക എന്ന ഉത്തരവാദിത്തം കൂടി ഈ പദ്ധതി മുൻനിർത്തുന്നു.ഹീലിംഗ് നോട്ട്സിലൂടെ 
ആശുപത്രികൾ, പ്രത്യേക പരിഗണന അർഹിക്കുന്നവരുടെ കേന്ദ്രങ്ങൾ എന്നിവിടങ്ങളിൽ സംഗീതത്തിലൂടെ ചികിത്സാപരമായ അനുഭവം നൽകുന്നു.
ഈ ഏപ്രിൽ മാസത്തിൽ മാത്രം ദോഹ കോളേജ്, ദോഹ ഇംഗ്ലീഷ് സ്പീക്കിംഗ് സ്കൂൾ, താരിഖ് ബിൻ സിയാദ് സ്കൂൾ, ടർക്കിഷ് സ്കൂൾ, അറബ് ഇന്റർനാഷണൽ സ്കൂൾ തുടങ്ങി പ്രമുഖ വിദ്യാലയങ്ങളിൽ ഇരുപതിലധികം സംഗീത പരിപാടികളാണ് ആസൂത്രണം ചെയ്തിരിക്കുന്നത്.
​സമൂഹത്തോടൊപ്പം വളരുകയും ഖത്തറിന്റെ സാംസ്കാരിക ശബ്ദം അടുത്ത തലമുറയിലേക്ക് എത്തിക്കുകയുമാണ് തങ്ങളുടെ ലക്ഷ്യമെന്ന് ഓർക്കസ്ട്ര കമ്മിറ്റി അംഗം മുഹമ്മദ് ഒവൈദ പറഞ്ഞു. പശ്ചാത്തലമോ സാഹചര്യമോ നോക്കാതെ ഖത്തറിലെ എല്ലാ കുട്ടികൾക്കും തത്സമയ ഓർക്കസ്ട്ര ആസ്വദിക്കാനുള്ള അവസരം ഇതിലൂടെ ഉറപ്പാക്കുമെന്നും അദ്ദേഹം കൂട്ടിച്ചേർത്തു. ഖത്തർ ഫിൽഹാർമോണിക് ഓർക്കസ്ട്രയുടെ ചരിത്രത്തിലെ ഏറ്റവും വലിയ ജനസമ്പർക്ക പരിപാടിയായിട്ടാണ് ഈ വർഷത്തെ പദ്ധതിയെ കണക്കാക്കുന്നത്.