​ദോഹ: ഖത്തറിലെ പ്രാഥമികാരോഗ്യ കേന്ദ്രങ്ങളിൽ നടപ്പിലാക്കി വരുന്ന 'ഫാമിലി മെഡിസിൻ മാതൃക' (Family Medicine Model) രോഗപ്രതിരോധത്തിലും രോഗങ്ങൾ നേരത്തെ കണ്ടെത്തുന്നതിലും വൻ വിജയമാണെന്ന് പ്രൈമറി ഹെൽത്ത് കെയർ കോർപ്പറേഷൻ (PHCC) വ്യക്തമാക്കി. രാജ്യത്തെ 31 ആരോഗ്യ കേന്ദ്രങ്ങളിലും നിലവിലുള്ള ഈ സംവിധാനം ആരോഗ്യസേവനങ്ങളുടെ ഗുണനിലവാരം ഉയർത്താൻ ഏറെ സഹായിച്ചിട്ടുണ്ട്. വ്യക്തികളുടെയും സമൂഹത്തിന്റെയും ആരോഗ്യം സംരക്ഷിക്കുന്നതിൽ ഫാമിലി ഫിസിഷ്യന്മാർ നിർണ്ണായക പങ്കാണ് വഹിക്കുന്നത്.
​മെയ് 19-ലെ ലോക ഫാമിലി ഡോക്ടർ ദിനാചരണത്തിന്റെ ഭാഗമായാണ് പി.എച്ച്.സി.സി ഈ നേട്ടങ്ങൾ പങ്കുവെച്ചത്. ‘ഡിജിറ്റൽ ലോകത്തെ കരുണാർദ്രമായ പരിചരണം’ (Compassionate Care in a Digital World) എന്നതായിരുന്നു ഈ വർഷത്തെ ദിനാചരണത്തിന്റെ സന്ദേശം. പ്രാഥമികാരോഗ്യ രംഗത്ത് ഡിജിറ്റൽ സാങ്കേതികവിദ്യകൾ പ്രയോജനപ്പെടുത്തുന്നതിന്റെ പ്രാധാന്യമാണ് ഇത് എടുത്തുകാണിക്കുന്നത്.
​കുടുംബത്തിലെ എല്ലാ അംഗങ്ങൾക്കും സമഗ്രമായ പരിചരണം നൽകുന്ന ഫാമിലി മെഡിസിൻ സംവിധാനം പ്രാഥമികാരോഗ്യ രംഗത്തിന്റെ പ്രധാന തൂണാണെന്ന് പി.എച്ച്.സി.സി ഓപ്പറേഷൻസ് ആൻഡ് ക്ലിനിക്കൽ അഫയേഴ്സ് അസിസ്റ്റന്റ് ഡയറക്ടർ ജനറൽ ഡോ. സാമിയ അഹമ്മദ് അൽ അബ്ദുള്ള പറഞ്ഞു. 2013 മുതൽ ഖത്തറിലെ എല്ലാ കേന്ദ്രങ്ങളിലും ഈ മാതൃക വിജയകരമായി പ്രവർത്തിക്കുന്നുണ്ട്.
​രോഗനിർണ്ണയത്തിനും ചികിത്സയ്ക്കുമപ്പുറം, രോഗികളുമായും അവരുടെ കുടുംബങ്ങളുമായും ദീർഘകാലത്തെ നല്ലൊരു ബന്ധം സ്ഥാപിക്കാൻ ഫാമിലി ഡോക്ടർമാർക്ക് സാധിക്കുന്നുണ്ടെന്ന് ഡോ. സാമിയ ചൂണ്ടിക്കാട്ടി. ഇത് കുടുംബങ്ങളുടെ ആരോഗ്യപരവും പാരമ്പര്യവുമായ ചരിത്രം കൃത്യമായി മനസ്സിലാക്കാനും ആവശ്യമായ ഘട്ടങ്ങളിൽ വേഗത്തിൽ ഇടപെടാനും ഡോക്ടർമാരെ സഹായിക്കുന്നു.
​ക്രോണിക് രോഗങ്ങൾ, കാൻസർ എന്നിവ നേരത്തെ കണ്ടെത്തുന്നതിനും പ്രതിരോധ കുത്തിവെപ്പുകൾ ഉറപ്പാക്കുന്നതിനും കൃത്യമായ ആരോഗ്യപരിശോധനകൾക്കും ഈ മാതൃക ഊന്നൽ നൽകുന്നു. പ്രമേഹം, ഉയർന്ന രക്തസമ്മർദ്ദം, ഹൃദ്രോഗങ്ങൾ എന്നിവയുള്ള രോഗികളെ കൃത്യമായി നിരീക്ഷിക്കുന്നതിലൂടെ ആരോഗ്യപ്രശ്നങ്ങൾ സങ്കീർണ്ണമാകുന്നത് തടയാൻ കഴിയുന്നുണ്ട്. കൂടാതെ, മാനസികാരോഗ്യ പിന്തുണയും കൗൺസിലിംഗും ഇതിലൂടെ ലഭ്യമാക്കുന്നു.
​ആരോഗ്യകേന്ദ്രങ്ങളിൽ തന്നെ സമഗ്രമായ ചികിത്സ ലഭിക്കുന്നതിനാൽ വലിയ ആശുപത്രികളിലെ തിരക്ക് കുറയ്ക്കാനും അനാവശ്യമായ റഫറലുകൾ ഒഴിവാക്കാനും ഈ സംവിധാനം വഴി സാധിക്കുന്നുണ്ടെന്നും ഡോ. സാമിയ അൽ അബ്ദുള്ള കൂട്ടിച്ചേർത്തു. സാങ്കേതികവിദ്യയുടെ വളർച്ചയിലും ഡോക്ടറും രോഗിയും തമ്മിലുള്ള മാനുഷികമായ ബന്ധത്തിന് തന്നെയാണ് പി.എച്ച്.സി.സി മുൻഗണന നൽകുന്നത്.