ദോഹ: സോഷ്യൽ ഗവൺമെന്റ്സ് അവാർഡിന്റെ മൂന്നാം പതിപ്പിൽ കായിക വിഭാഗത്തിലെ 'ഏറ്റവും മികച്ച സർഗ്ഗാത്മക സോഷ്യൽ മീഡിയ ഉള്ളടക്കത്തിനുള്ള' (Best Creative Content on Social Media) പ്രാദേശിക പുരസ്കാരം ഖത്തർ ഒളിമ്പിക് കമ്മിറ്റി (QOC) കരസ്ഥമാക്കി. മികച്ച ഡിജിറ്റൽ കണ്ടന്റുകളിലൂടെയും സോഷ്യൽ മീഡിയ ഇടപെടലുകളിലൂടെയും കായിക പ്രേമികളിലേക്ക് ആഴത്തിൽ ഇറങ്ങിച്ചെല്ലാൻ സാധിച്ചതിനാണ് ഈ നേട്ടം.
അറബ് ലോകത്തെ വിവിധ സർക്കാരുകളുടെ ഡിജിറ്റൽ കമ്യൂണിക്കേഷനിലെയും ഡിജിറ്റൽ മീഡിയയിലെയും മികവും പുതുമകളും കണ്ടെത്താൻ സംഘടിപ്പിക്കുന്നതാണ് ഈ പുരസ്കാര ചടങ്ങ്. 12 അറബ് രാജ്യങ്ങളിൽ നിന്നായി 16 പ്രമുഖ സർക്കാർ സ്ഥാപനങ്ങൾ 13 വെവ്വേറെ വിഭാഗങ്ങളിലായി ഈ വർഷത്തെ പുരസ്കാരത്തിനായി മത്സരിച്ചിരുന്നു. തന്ത്രപരമായ ആസൂത്രണം, നിർവ്വഹണം, ജനങ്ങളിലുണ്ടാക്കിയ സ്വാധീനം എന്നിവ മുൻനിർത്തി വിദഗ്ധരടങ്ങുന്ന ജൂറിയാണ് വിജയികളെ തിരഞ്ഞെടുത്തത്.
സർക്കാർ തലത്തിലുള്ള ഡിജിറ്റൽ ആശയവിനിമയ രംഗത്തെ മുൻനിര മാതൃകകളെ പ്രോത്സാഹിപ്പിക്കാനും പരസ്പരം മികച്ച അനുഭവങ്ങൾ പങ്കുവെക്കാനുമാണ് അവാർഡിലൂടെ ലക്ഷ്യമിടുന്നത്. ഡിജിറ്റൽ പ്ലാറ്റ്‌ഫോമുകളിലൂടെ ആകർഷകമായ കായിക ഉള്ളടക്കങ്ങൾ ജനങ്ങളിലെത്തിക്കാൻ ഒളിമ്പിക് കമ്മിറ്റി സംഘം നടത്തുന്ന കൂട്ടായ ശ്രമങ്ങൾക്കുള്ള അംഗീകാരമാണിതെന്ന് ക്യു.ഒ.സി വ്യക്തമാക്കി.
