ദോഹ: 'റമദാൻ ഒരു സുവർണാവസരമാണ്' എന്ന വിശേഷ പ്രമേയത്തോടെ 2027-ലെ ഖത്തർ ദേശീയ കായിക ദിനം ഫെബ്രുവരി 9 ചൊവ്വാഴ്ച ആഘോഷിക്കും. ചരിത്രത്തിലാദ്യമായാണ് ദേശീയ കായിക ദിനം വിശുദ്ധ റമദാൻ മാസത്തിൽ വന്നെത്തുന്നത്.
റമദാനിലെ വ്രതാനുഷ്ഠാനത്തോടൊപ്പം കായികവും ശാരീരികക്ഷമതയും ജീവിതശൈലിയുടെ ഭാഗമാക്കേണ്ടതിന്റെ പ്രാധാന്യത്തെക്കുറിച്ച് പൊതുജനങ്ങളിൽ അവബോധം വളർത്തുകയാണ് ഇത്തവണത്തെ ആഘോഷങ്ങളുടെ പ്രധാന ലക്ഷ്യം. റമദാൻ മാസത്തിൽ ദീർഘകാല ആരോഗ്യം നിലനിർത്തുന്നതിനും ഊർജ്ജസ്വലതയോടെ ഇരിക്കുന്നതിനും കായിക പ്രവർത്തനങ്ങൾ എങ്ങനെ പ്രയോജനപ്പെടുത്താം എന്ന് ഈ ദിനം വ്യക്തമാക്കുന്നു.
രാജ്യത്തുടനീളം വിപുലമായ കായിക-ആരോഗ്യ പരിപാടികളാണ് ദിനാചരണത്തിന്റെ ഭാഗമായി ആസൂത്രണം ചെയ്യുന്നത്. ഖത്തറിലെ പൗരന്മാർക്കും പ്രവാസികൾക്കും അനുയോജ്യമായ രീതിയിൽ റമദാനിന്റെ അന്തരീക്ഷത്തിന് ഇണങ്ങുന്ന പ്രത്യേക കായിക മത്സരങ്ങളും വ്യായാമ പരിശീലനങ്ങളും സജ്ജീകരിക്കും.
ശരീരത്തിനും മനസ്സിനും ഒരുപോലെ ആത്മീയവും ശാരീരികവുമായ ഉന്മേഷം പകരാൻ റമദാൻ മാസത്തിലെ കായിക ദിനം എല്ലാവർക്കും ഒരു സുവർണ്ണാവസരമായിരിക്കുമെന്ന് സംഘാടകർ വ്യക്തമാക്കി.
