ദോഹ: സമൂഹത്തിൽ മാനസികാരോഗ്യത്തെക്കുറിച്ച് അവബോധം വളർത്തുന്നതിനായി പുതിയ ഡിജിറ്റൽ ലൈബ്രറി ശേഖരം ഖത്തർ നാഷണൽ ലൈബ്രറി (QNL) അവതരിപ്പിച്ചു. 'വീട്ടിലിരുന്ന് ലൈബ്രറി ഉപയോഗിക്കാം - നിങ്ങളുടെ ആരോഗ്യത്തിനായി വായിക്കാം' എന്ന സന്ദേശവുമായാണ് ലൈബ്രറി ഈ സേവനം ഒരുക്കിയിരിക്കുന്നത്.ഇ-ബുക്കുകളും ഓഡിയോ ബുക്കുകളും: മാനസികാരോഗ്യം, സമ്മർദ്ദ നിയന്ത്രണം (Stress Management), പോസിറ്റീവ് ചിന്താഗതി, ജീവിതനിലവാരം മെച്ചപ്പെടുത്തൽ എന്നീ വിഷയങ്ങളിലുള്ള വിപുലമായ പുസ്തകങ്ങൾ ഡിജിറ്റൽ പ്ലാറ്റ്‌ഫോമിൽ ലഭ്യമാണ്.
ക്യു.എൻ.എൽ മൊബൈൽ ആപ്പ് വഴിയോ വെബ്സൈറ്റ് വഴിയോ അംഗങ്ങൾക്ക് ഈ പുസ്തകങ്ങൾ വായിക്കാനും ഓഡിയോ ബുക്കുകൾ കേൾക്കാനും സാധിക്കും.
പൊതുജനങ്ങൾക്ക് ലൈബ്രറിയിൽ സൗജന്യമായി അംഗത്വമെടുക്കാം. ഇത് വഴി പതിനായിരക്കണക്കിന് ഇ-ബുക്കുകളിലേക്കും മറ്റ് വിവരശേഖരങ്ങളിലേക്കും പ്രവേശനം ലഭിക്കും.
ദൈനംദിന ജീവിതത്തിലെ സമ്മർദ്ദങ്ങൾക്കിടയിൽ മാനസിക വ്യക്തതയും സന്തുലിതാവസ്ഥയും നിലനിർത്താൻ വായനക്കാരെ സഹായിക്കുകയാണ് ഈ പദ്ധതിയിലൂടെ ലക്ഷ്യമിടുന്നത്. വായനക്കാരുടെ സൗകര്യത്തിനനുസരിച്ച് ഏത് സമയത്തും ഉപയോഗിക്കാവുന്ന തരത്തിലാണ് പുസ്തകങ്ങൾ ക്രമീകരിച്ചിരിക്കുന്നത്.
സന്തുലിതമായ ജീവിതശൈലി സ്വീകരിക്കാനും മാനസിക ഉന്മേഷത്തിനായി സമയം കണ്ടെത്താനും ഖത്തർ നാഷണൽ ലൈബ്രറി സമൂഹത്തോട് അഭ്യർത്ഥിച്ചു.
