
ദോഹ:യുവാക്കൾക്ക് സന്നദ്ധസേവന അവസരങ്ങൾ വിപുലീകരിക്കുന്നതിനും അവരുടെ സാമൂഹിക പങ്കാളിത്തം വർദ്ധിപ്പിക്കുന്നതിനുമായി ഖത്തർ മ്യൂസിയംസും ഖത്തർ ചാരിറ്റിയും സഹകരണ കരാറിൽ ഒപ്പുവെച്ചു. അൽ ബിദ്ദ പാർക്കിലെ എക്സ്പോ ദോഹ കെട്ടിടത്തിലുള്ള യൂത്ത് സെന്റർ ആസ്ഥാനത്താണ് ചടങ്ങ് നടന്നത്. ഖത്തർ മ്യൂസിയംസിനെ പ്രതിനിധീകരിച്ച് യൂത്ത് സെന്ററാണ് കരാറിൽ പങ്കാളിയായത്.
യുവാക്കൾക്ക് തങ്ങളുടെ കഴിവുകൾ വികസിപ്പിക്കാനും നേതൃത്വപരമായ പങ്കുവഹിക്കാനും സമൂഹത്തെ സേവിക്കാനുമുള്ള അവസരങ്ങൾ ഒരുക്കുക എന്നതാണ് ഈ കരാറിന്റെ പ്രധാന ലക്ഷ്യം.
രാജ്യത്തെ സാംസ്കാരികവും സാമൂഹികവുമായ വികസനത്തിനായുള്ള ഖത്തർ മ്യൂസിയംസിന്റെ പ്രതിബദ്ധതയുടെ ഭാഗമാണ് യുവജനങ്ങളിലുള്ള ഈ നിക്ഷേപമെന്ന് ഖത്തർ മ്യൂസിയംസ് സി.ഇ.ഒ മുഹമ്മദ് സഅദ് അൽ റുമൈഹി പറഞ്ഞു. സംസ്കാരം, പഠനം, സന്നദ്ധസേവനം എന്നിവ സംയോജിപ്പിക്കുന്ന ഈ പങ്കാളിത്തത്തിലൂടെയും 'പ്രോസ്പെരിറ്റി' (Prosperity) സംരംഭത്തിലൂടെയും ഖത്തറിന്റെ ഭാവി രൂപപ്പെടുത്താൻ പ്രാപ്തരായ ഒരു തലമുറയെ വാർത്തെടുക്കാൻ സാധിക്കുമെന്നും അദ്ദേഹം വ്യക്തമാക്കി.
യുവജനങ്ങളെ ശാക്തീകരിക്കുന്നതിലും സാമൂഹിക പ്രവർത്തനങ്ങളിൽ പങ്കാളികളാക്കുന്നതിലുമുള്ള ഇരുസ്ഥാപനങ്ങളുടെയും പൊതുവായ താൽപര്യമാണ് ഈ കരാറിലൂടെ പ്രതിഫലിക്കുന്നതെന്ന് ഖത്തർ ചാരിറ്റി സി.ഇ.ഒ യൂസഫ് ബിൻ അഹമ്മദ് അൽ കുവാരി അഭിപ്രായപ്പെട്ടു. സന്നദ്ധസേവനം, സംസ്കാരം, സർഗ്ഗാത്മകത എന്നീ മേഖലകളിലെ ഇരുവിഭാഗത്തിന്റെയും വൈദഗ്ധ്യം സംയോജിപ്പിച്ച് കൗമാരക്കാരുടെ കഴിവുകൾ വളർത്തുന്നതിനും സാമൂഹിക ഉത്തരവാദിത്തം ഏറ്റെടുക്കുന്നതിനും സഹായിക്കുന്ന പദ്ധതികൾ നടപ്പിലാക്കുമെന്നും അദ്ദേഹം കൂട്ടിച്ചേർത്തു.
കരാർ പ്രകാരം, 'പ്രോസ്പെരിറ്റി' സംരംഭത്തിലൂടെ ചിട്ടയായ സന്നദ്ധസേവന അവസരങ്ങൾ, പരിശീലനം, സംയുക്ത സാമൂഹിക-വിദ്യാഭ്യാസ പദ്ധതികൾ എന്നിവ ഇരുസ്ഥാപനങ്ങളും ചേർന്ന് ഒരുക്കും. യുവാക്കൾക്ക് തങ്ങളുടെ താൽപര്യങ്ങൾ കണ്ടെത്താനും ബന്ധങ്ങൾ വളർത്താനും സമൂഹനിർമ്മാണത്തിൽ സജീവമായി പങ്കാളികളാകാനുമുള്ള ഒരു വേദിയായി യൂത്ത് സെന്ററിനെ മാറ്റുന്നതിന് ഈ ദീർഘകാല കരാർ പിന്തുണ നൽകും.











