ദോഹ: പരിസ്ഥിതി സംരക്ഷണത്തിലും സുസ്ഥിര സാംസ്കാരിക പരിപാലനത്തിലും നിർണ്ണായക നാഴികക്കല്ല് പിന്നിട്ട് ഖത്തർ മ്യൂസിയംസ് (QM). രാജ്യത്തെ ഏറ്റവും പ്രധാനപ്പെട്ട നാല് സാംസ്കാരിക-പൈതൃക കേന്ദ്രങ്ങളുടെ പ്രവർത്തനങ്ങൾക്കും സേവനങ്ങൾക്കും അന്താരാഷ്ട്ര 'കാർബൺ ന്യൂട്രാലിറ്റി സർട്ടിഫിക്കേഷൻ' (Carbon Neutrality Certification) ലഭിച്ചു.
​അന്താരാഷ്ട്ര അംഗീകാരമുള്ള ISO 14068-1:2023 മാനദണ്ഡങ്ങൾ പാലിച്ച് 2025-ലെ പ്രവർത്തന കാലയളവ് വിലയിരുത്തിയാണ് ഈ അപൂർവ്വ ബഹുമതി നൽകിയിരിക്കുന്നത്.
നാഷണൽ മ്യൂസിയം ഓഫ് ഖത്തർ (NMoQ)
​മ്യൂസിയം ഓഫ് ഇസ്ലാമിക് ആർട്ട് (MIA)
​ഫയർ സ്റ്റേഷൻ (Fire Station)
​അൽ സുബാറ കോട്ട (Al Zubarah Fort)എന്നിവയാണ്ആദരിക്കപ്പെട്ട പൈതൃക കേന്ദ്രങ്ങൾ.നാഷണൽ മ്യൂസിയം ഓഫ് ഖത്തർ ഓഡിറ്റോറിയത്തിൽ നടന്ന പ്രൗഢഗംഭീരമായ ചടങ്ങിൽ, ഗൾഫ് ഓർഗനൈസേഷൻ ഫോർ റിസർച്ച് ആൻഡ് ഡെവലപ്‌മെന്റ് (GORD) സ്ഥാപക ചെയർമാൻ ഡോ. യൂസഫ് അൽഹോർ ഖത്തർ മ്യൂസിയംസ് ചീഫ് എക്സിക്യൂട്ടീവ് ഓഫീസർ മുഹമ്മദ് സാദ് അൽ റുമൈഹിക്ക് സർട്ടിഫിക്കറ്റുകൾ കൈമാറി.
​വൈദ്യുതി, ജലം, റഫ്രിജറന്റ് എന്നിവയുടെ ഉപയോഗം, ഖരമാലിന്യ സംസ്കരണം, മലിനജല നിർമാർജനം, ജീവനക്കാരുടെയും സന്ദർശകരുടെയും യാത്രകൾ തുടങ്ങിയ വിവിധ സ്രോതസ്സുകളിൽ നിന്നുള്ള ഹരിതഗൃഹ വാതക പുറന്തള്ളൽ (GHG Emissions) കൃത്യമായി കണക്കാക്കിയാണ് സർട്ടിഫിക്കേഷൻ മാതൃക തയ്യാറാക്കിയത്. തുടർന്ന് പ്രമുഖ അന്താരാഷ്ട്ര ഏജൻസിയായ 'എർത്ത്ഹുഡ് സർവീസസ് ലിമിറ്റഡ്' (Earthood Services Limited) നടത്തിയ സ്വതന്ത്രമായ മൂന്നാം കക്ഷി ഓഡിറ്റിംഗിന് ശേഷമാണ് ഈ പദവി ഔദ്യോഗികമായി അനുവദിച്ചത്.
​സാംസ്കാരിക പൈതൃകം സംരക്ഷിക്കുന്നതിനൊപ്പം വരുംതലമുറയ്ക്കായി പരിസ്ഥിതി കാത്തുസൂക്ഷിക്കുക എന്ന ഖത്തർ നാഷണൽ വിഷൻ 2030-ന്റെ ലക്ഷ്യങ്ങളോടുള്ള പൂർണ്ണമായ പ്രതിബദ്ധതയാണ് ഈ നേട്ടത്തിലൂടെ അടിവരയിടുന്നത് എന്ന് ഖത്തർ മ്യൂസിയംസ് സി.ഇ.ഒ മുഹമ്മദ് സാദ് അൽ റുമൈഹി വ്യക്തമാക്കി. നവീകരണങ്ങളിലൂടെയും പുനരുപയോഗ ഊർജ്ജ സ്രോതസ്സുകളിലൂടെയും 2030-ഓടെ കാർബൺ ഉദ്‌വമനം ഇനിയും കുറയ്ക്കാനുള്ള സമഗ്രമായ പ്ലാൻ ഗോർഡുമായി (GORD) ചേർന്ന് നടപ്പിലാക്കുമെന്നും അധികൃതർ അറിയിച്ചു.