ദോഹ:രാജ്യത്തുടനീളമുള്ള സ്വകാര്യ റെസിഡൻഷ്യൽ വില്ലകളുടെ നിർമ്മാണത്തിനായി പ്ലോട്ടുകൾ വിഭജിക്കുമ്പോൾ വേണ്ട കുറഞ്ഞ വിസ്തീർണം 400 ചതുരശ്ര മീറ്ററായി നിജപ്പെടുത്തിക്കൊണ്ട് ഖത്തർ നഗരസഭ മന്ത്രാലയം തീരുമാനത്തിന് അംഗീകാരം നൽകി. ഭൂവിനിയോഗത്തിന്റെ കാര്യക്ഷമത വർദ്ധിപ്പിക്കുന്നതിനും നിലവിലുള്ള ഭൗതികസൗകര്യങ്ങളുടെ മികച്ച വിനിയോഗം ഉറപ്പാക്കുന്നതിനുമാണ് ഈ ഇളവ് പ്രഖ്യാപിച്ചിരിക്കുന്നത്.
റിയൽ എസ്റ്റേറ്റ് വിപണിയെക്കുറിച്ചുള്ള സമഗ്രമായ പഠനത്തിനും മുൻകാല നിയന്ത്രണങ്ങളുടെ ഫലങ്ങൾ വിലയിരുത്തിയതിനും ശേഷമാണ് പുതിയ തീരുമാനം കൈക്കൊണ്ടത്.ഒറ്റപ്പെട്ട വില്ല നിർമ്മിക്കുന്നതിന് പ്ലോട്ടിന്റെ കുറഞ്ഞ വിസ്തീർണം 400 ചതുരശ്ര മീറ്ററും (കുറഞ്ഞത് 15 മീറ്റർ ഫ്രണ്ടേജ്) ആയിരിക്കണം.ഒരുമിച്ച് ചേർന്ന് നിൽക്കുന്ന രണ്ട് വില്ലകൾക്ക് 600 ചതുരശ്ര മീറ്ററും (കുറഞ്ഞത് 20 മീറ്റർ ഫ്രണ്ടേജ്) ആവശ്യമാണ്.
ഈ ഇളവുകൾ വസ്തുവുടമകൾക്ക് ഒരേ പ്ലോട്ടിൽ തന്നെ ഒന്നിലധികം വില്ലകൾ നിർമ്മിക്കാനുള്ള സൗകര്യമൊരുക്കുകയും വിപണിയിൽ ഭവന ഓപ്ഷനുകൾ വർദ്ധിപ്പിക്കുകയും ചെയ്യും.
അതേസമയം, മോഡൽ ഏരിയകൾ, മുതിർന്ന ഉദ്യോഗസ്ഥർക്കായി അനുവദിച്ച പ്ലോട്ടുകൾ തുടങ്ങി പ്രത്യേക വ്യവസ്ഥകളുള്ള സ്ഥലങ്ങൾക്ക് ഈ ഇളവ് ബാധകമല്ല. ഖത്തർ നാഷണൽ വിഷൻ 2030, മൂന്നാം ദേശീയ വികസന തന്ത്രം എന്നിവ മുൻനിർത്തിയാണ് ടൗൺ പ്ലാനിംഗ് നയങ്ങളിൽ ഇത്തരം മാറ്റങ്ങൾ വരുത്തുന്നതെന്ന് മന്ത്രാലയം വ്യക്തമാക്കി.
