ദോഹ: ഖത്തർ തൊഴിൽ മന്ത്രാലയം (MoL) ‘ട്രസ്റ്റഡ് എംപ്ലോയർ സ്കീം’ പ്രഖ്യാപിച്ചു. സ്കീമിന്റെ പൈലറ്റ് പദ്ധതിയുടെ ഭാഗമായി സ്വകാര്യ മേഖലയിലെ കമ്പനികൾക്കായി  പരിചയാവതരണ യോഗം സംഘടിപ്പിച്ചു. യോഗത്തിൽ മന്ത്രാലയത്തിലെ അസിസ്റ്റന്റ് അണ്ടർസെക്രട്ടറി ശൈഖ നജ്വ ബിൻത് അബ്ദുറഹ്‌മാൻ അൽ താനി പങ്കെടുത്തു.
തൊഴിൽ നിയമാനുസൃതത ഉറപ്പാക്കുകയും, തൊഴിൽ വിപണിയിൽ വിശ്വാസം ശക്തിപ്പെടുത്തുകയും, ഖത്തർ നാഷണൽ വിഷൻ 2030-നനുസരിച്ച് ഉയർന്ന നിലവാരമുള്ള തൊഴിൽ സംസ്കാരവും സ്ഥിരതയുള്ള തൊഴിൽ അന്തരീക്ഷവും വളർത്തുകയും ചെയ്യുക എന്നതാണ് പദ്ധതിയുടെ പ്രധാന ലക്ഷ്യം.
 അർഹതയുള്ള കമ്പനികളുടെ മാനദണ്ഡങ്ങൾ, പോയിന്റ് അടിസ്ഥാനമാക്കിയ മൂല്യനിർണയ സംവിധാനം എന്നിവയെക്കുറിച്ച് മന്ത്രാലയ ഉദ്യോഗസ്ഥർ വിശദീകരിച്ചു.
 കമ്പനികൾ തൊഴിൽ ഖത്തറൈസേഷൻ, തൊഴിൽ നിയമങ്ങളും കുടിയേറ്റ ചട്ടങ്ങളും പാലിക്കൽ, വേജ് പ്രൊട്ടക്ഷൻ, നികുതി ബാധ്യതകൾ പാലിക്കൽ, തൊഴിലാളി വിവരങ്ങളിലെ സുതാര്യത എന്നിവ ഉൾപ്പെടെയുള്ള നിരവധി സൂചികകളെ അടിസ്ഥാനമാക്കി വിലയിരുത്തപ്പെടും.
ഉത്തരവാദിത്തപരമായ തൊഴിൽ രീതികൾ പാലിക്കുന്ന സ്ഥാപനങ്ങൾക്ക് വർക്ക് വിസാ അനുമതികൾ വേഗത്തിൽ ലഭ്യമാക്കും.
 നിയമന നടപടികൾ എളുപ്പമാക്കുക, നിയന്ത്രണ ഏജൻസികളുമായി മികച്ച സഹകരണം എന്നിവ ഉൾപ്പെടുന്ന നിരവധി ആനുകൂല്യങ്ങൾ ലഭിക്കും.
നിയമാനുസൃതത, തൊഴിലാളികളുടെ അവകാശ സംരക്ഷണം, റിക്രൂട്ട്മെന്റിലെ സുതാര്യത എന്നിവയാണ് പദ്ധതിയിൽ അംഗത്വം നേടാനുള്ള പ്രധാന മാനദണ്ഡങ്ങൾ. ആദ്യഘട്ടത്തിൽ പങ്കെടുക്കുന്ന സ്ഥാപനങ്ങൾക്കാണ് പദ്ധതിയുടെ പ്രോത്സാഹനങ്ങൾക്കും അംഗീകാരങ്ങൾക്കും മുൻഗണന ലഭിക്കുക.
തൊഴിൽ മന്ത്രാലയം, മറ്റ് സർക്കാർ പങ്കാളികളുമായി സഹകരിച്ച്, പദ്ധതി രാജ്യവ്യാപകമായി നടപ്പാക്കാനുള്ള തയ്യാറെടുപ്പിലാണ്.