ദോഹ: പാസ്‌പോർട്ട് ഓഫീസുകളിലോ സർവീസ് സെന്ററുകളിലോ നേരിട്ടെത്താതെ തന്നെ, ഓൺലൈനായി തൽസമയം വിസ ദീർഘിപ്പിച്ചു നൽകുന്ന പുതിയ സേവനത്തിന് ഖത്തർ ആഭ്യന്തര മന്ത്രാലയം തുടക്കമിട്ടു. മന്ത്രാലയത്തിന്റെ ഔദ്യോഗിക വെബ്‌സൈറ്റ് (MOI Website) വഴി പൊതുജനങ്ങൾക്ക് ഇനി മുതൽ ഈ സേവനം ലഭ്യമാകും.
​പൊതുജനങ്ങൾക്ക് തടസ്സമില്ലാത്ത സേവനങ്ങൾ ഉറപ്പാക്കുന്നതിന്റെ ഭാഗമായി 'എക്സ്' (X) പ്ലാറ്റ്‌ഫോമിലൂടെയാണ് മന്ത്രാലയം ഈ വിവരവും അതിനായി പിന്തുടരേണ്ട ഘട്ടങ്ങളും പങ്കുവെച്ചത്.ആദ്യം മന്ത്രാലയത്തിന്റെ ഔദ്യോഗിക വെബ്‌സൈറ്റ് സന്ദർശിച്ച്, അതിലെ സേവനങ്ങളുടെ വിഭാഗത്തിൽ നിന്ന് Inquiries and Requests (അന്വേഷണങ്ങളും അഭ്യർത്ഥനകളും) എന്ന ഓപ്ഷൻ തിരഞ്ഞെടുക്കുക.
​തുടർന്ന് വരുന്ന പേജിൽ നിന്ന് Visa Services (വിസ സേവനങ്ങൾ) കണ്ടെത്തി, അതിലുള്ള Extend the feature / Visa (വിസ ദീർഘിപ്പിക്കൽ) എന്ന ഭാഗത്തേക്ക് പ്രവേശിക്കുക.
​അവിടെ നിന്ന് Query and Extension എന്നത് ക്ലിക്ക് ചെയ്ത്, റിക്രൂട്ടർ, പ്രതിനിധി അല്ലെങ്കിൽ അംഗീകൃത വ്യക്തിയുടെ ഖത്തർ ഐഡി (QID) നമ്പറോ അപേക്ഷാ തീയതിയോ നൽകി വിവരങ്ങൾ പൂരിപ്പിക്കുക.
​അതിനുശേഷം ഹെൽത്ത് ഇൻഷുറൻസ് മാനദണ്ഡങ്ങൾ പാലിച്ചിട്ടുണ്ടെന്ന് സിസ്റ്റം വഴി ഉറപ്പുവരുത്തുക (ഇതിനായി അംഗീകൃത ഇൻഷുറൻസ് കമ്പനികളുടെ ലിങ്ക് അവിടെ ലഭ്യമാണ്).
​അവസാനമായി, വിസ ദീർഘിപ്പിക്കേണ്ട ആവശ്യമായ കാലാവധി തിരഞ്ഞെടുത്ത് നിർദ്ദിഷ്ട ഫീസ് അടയ്ക്കുന്നതോടെ നടപടികൾ പൂർത്തിയാകും.
 പുതിയ സംവിധാനം വഴി പ്രവാസികൾക്കും സന്ദർശകർക്കും സമയലാഭം ലഭിക്കുമെന്നും, സർവീസ് സെന്ററുകളിലെ തിരക്ക് കുറയ്ക്കാൻ സാധിക്കുമെന്നും അധികൃതർ വ്യക്തമാക്കി.