ദോഹ: ഈ വർഷത്തെ (1447 ഹിജ്റ) ഹജ്ജ് സീസണിൽ ഖത്തരി ഹജ്ജ് ഗ്രൂപ്പുകൾ (കമ്പെയ്നുകൾ) തയ്യാറാക്കുന്ന ഏറ്റവും മികച്ച ഡിജിറ്റൽ ഹജ്ജ് ആപ്ലിക്കേഷന് ഖത്തർ ഔഖാഫ് ഇസ്‌ലാമിക കാര്യ മന്ത്രാലയം പുതിയ പുരസ്കാരം പ്രഖ്യാപിച്ചു. ഹജ്ജ് സേവന രംഗത്ത് ഡിജിറ്റൽ പരിവർത്തനം വേഗത്തിലാക്കുക, തീർത്ഥാടകരുടെ അനുഭവം കൂടുതൽ സുഗമമാക്കുന്നതിന് നൂതന സാങ്കേതികവിദ്യകൾ പ്രയോജനപ്പെടുത്താൻ ഹജ്ജ് ഗ്രൂപ്പുകളെ പ്രോത്സാഹിപ്പിക്കുക എന്നിവയാണ് ഈ പദ്ധതിയുടെ പ്രധാന ലക്ഷ്യം.
മത്സരത്തിൽ പങ്കെടുക്കുന്ന ആപ്ലിക്കേഷനുകളിൽ തീർത്ഥാടകർക്ക് ആവശ്യമായ എല്ലാ സേവനങ്ങളും സംയോജിപ്പിച്ചിരിക്കണമെന്ന് മന്ത്രാലയം നിർദ്ദേശിച്ചു. ഹജ്ജ് രജിസ്ട്രേഷൻ, യാത്രാ വിവരങ്ങൾ, പുണ്യസ്ഥലങ്ങളിലെ ക്യാമ്പുകളുടെ ലൊക്കേഷൻ, മതപരമായ മാർഗ്ഗനിർദ്ദേശങ്ങൾ, ക്യാമ്പ് ഉദ്യോഗസ്ഥരുമായി നേരിട്ട് ബന്ധപ്പെടാനുള്ള സൗകര്യം തുടങ്ങിയവ ഇതിൽ ഉൾപ്പെടണം. തീർത്ഥാടകരുടെ സംശയങ്ങൾക്ക് മറുപടി നൽകാൻ കൃത്രിമ ബുദ്ധി (Artificial Intelligence) ഉപയോഗിക്കുന്ന ആപ്പുകൾക്ക് പ്രത്യേക പരിഗണന നൽകും.
ആപ്ലിക്കേഷനുകളുടെ ഉപയോഗ ലാളിത്യം, സേവനത്തിന്റെ ഗുണനിലവാരം, വേഗത, സുരക്ഷ, തീർത്ഥാടകരെ സഹായിക്കാൻ സ്മാർട്ട് സാങ്കേതികവിദ്യകൾ എത്രത്തോളം ഫലപ്രദമായി ഉപയോഗിച്ചു എന്നിവ വിലയിരുത്തിയായിരിക്കും പുരസ്കാരം നിർണ്ണയിക്കുക. സ്മാർട്ട് സേവനങ്ങൾ വ്യാപിപ്പിക്കുന്നതിനും ഖത്തറിൽ നിന്നുള്ള തീർത്ഥാടകർക്ക് മികച്ച പിന്തുണ ഉറപ്പാക്കുന്നതിനുമായി മന്ത്രാലയം നടപ്പിലാക്കുന്ന 2025–2030 തന്ത്രപരമായ പദ്ധതിയുടെ ഭാഗമായാണ് ഈ പുരസ്കാരംഏർപ്പെടുത്തിയിരിക്കുന്നത്.
