ദോഹ: ഖത്തറിൽ ഇന്ന് രാത്രി തണുപ്പ് അനുഭവപ്പെടുമെന്നും കടലിൽ കാറ്റും തിരമാലകളും ശക്തമാകാൻ സാധ്യതയുണ്ടെന്നും കാലാവസ്ഥാ വകുപ്പിന്റെ മുന്നറിയിപ്പ്. പകൽ സമയത്ത് ആകാശം ഭാഗികമായി മേഘാവൃതമായിരിക്കുമെങ്കിലും രാത്രിയോടെ അന്തരീക്ഷം തണുപ്പിലേക്ക് മാറുമെന്നാണ് പ്രവചനം.
കരയിൽ വടക്കുപടിഞ്ഞാറൻ ദിശയിൽ നിന്ന് മണിക്കൂറിൽ 5 മുതൽ 15 നോട്ട്സ് വേഗതയിൽ കാറ്റ് വീശാൻ സാധ്യതയുണ്ട്. പകൽ സമയത്ത് കാറ്റിന്റെ വേഗത 20 നോട്ട്സ് വരെ ഉയർന്നേക്കാം. കടലിൽ കാറ്റിന്റെ വേഗത 32 നോട്ട്സ് വരെയാകാൻ സാധ്യതയുണ്ട്.കടലിൽ തിരമാലകൾ 3 മുതൽ 7 അടി വരെ ഉയരാം. ചില സമയങ്ങളിൽ ഇത് 10 അടി വരെ ഉയരാൻ സാധ്യതയുള്ളതിനാൽ കടലിൽ പോകുന്നവർ അതീവ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.
കരയിലും കടലിലും കാഴ്ചപരിധി 5 മുതൽ 10 കിലോമീറ്റർ വരെയായിരിക്കും.
ശക്തമായ കാറ്റിനും ഉയർന്ന തിരമാലകൾക്കും സാധ്യതയുള്ളതിനാൽ കടൽയാത്ര നടത്തുന്നവരും വിനോദസഞ്ചാരികളും കാലാവസ്ഥാ നിർദ്ദേശങ്ങൾ കർശനമായി പാലിക്കണമെന്ന് ഖത്തർ കാലാവസ്ഥാ വകുപ്പ് (QMD) അറിയിച്ചു.
