ദോഹ:ഖത്തർ മീഡിയ കോർപ്പറേഷൻ സി.ഇ.ഒ ശൈഖ് ഖാലിദ് ബിൻ അബ്ദുൽ അസീസ് ബിൻ ജാസിം അൽഥാനി, ഗൾഫ് കോപ്പറേഷൻ കൗൺസിൽ (ജി.സി.സി) ഗൾഫ് റേഡിയോ ആൻഡ് ടെലിവിഷൻ ഓർഗനൈസേഷൻ ഡയറക്ടർ ജനറൽ ഡോ. അബ്ദുൽ റഹ്മാൻ ബിൻ അബ്ദുൽ അസീസ് അൽ ഹസ്സായുമായി ദോഹയിൽ കൂടിക്കാഴ്ച നടത്തി. ചൊവ്വാഴ്ചയായിരുന്നു ഇരുവരും തമ്മിലുള്ള ഔദ്യോഗിക കൂടിക്കാഴ്ച.
ഗൾഫ് മേഖലയിലെ സംയുക്ത മാധ്യമ സഹകരണം കൂടുതൽ ശക്തമാക്കുന്നതിനുള്ള വിവിധ മാർഗങ്ങൾ കൂടിക്കാഴ്ചയിൽ ചർച്ചയായി. ജി.സി.സി അംഗരാജ്യങ്ങൾക്കിടയിൽ റേഡിയോ, ടെലിവിഷൻ പരിപാടികളുടെ ഏകോപനം വർദ്ധിപ്പിക്കുന്നതിനുള്ള പ്രത്യേക സംവിധാനങ്ങളെക്കുറിച്ചും ഇരുനേതാക്കളും ആശയവിനിമയം നടത്തി.
ആധുനിക ഡിജിറ്റൽ പരിവർത്തനങ്ങൾക്ക് അനുസൃതമായി മാധ്യമരംഗത്തെ പുതുക്കുന്നതിനും, പങ്കിട്ട ഗൾഫ് സ്വത്വത്തെയും പൈതൃകത്തെയും കൂടുതൽ മികച്ച രീതിയിൽ പൊതുസമൂഹത്തിന് മുന്നിൽ അവതരിപ്പിക്കുന്നതിനും പരസ്പര സഹകരണം ഉറപ്പാക്കാൻ യോഗത്തിൽ തീരുമാനമായി.
