​ദോഹ: രാജ്യത്തിന്റെ സാമ്പത്തിക നയങ്ങളിൽ വലിയ മാറ്റങ്ങൾ വരുത്തിക്കൊണ്ട് ഡിജിറ്റൽ പരിവർത്തന രംഗത്ത് ഖത്തർ നിർണായക നേട്ടം കൈവരിക്കുന്നു. പരമ്പരാഗത ഊർജ്ജ അധിഷ്ഠിത സാമ്പത്തിക മാതൃകയിൽ നിന്ന് സാങ്കേതികവിദ്യ, ഡാറ്റ, ബൗദ്ധിക സ്വത്ത് (Intellectual Property), വിജ്ഞാനം എന്നിവയിലൂന്നിയുള്ള വളർച്ചയിലേക്ക് രാജ്യം അതിവേഗം മാറുന്നതായി ആഗോള സൂചികകൾ വ്യക്തമാക്കുന്നു.
​വേൾഡ് ഇന്റലക്ച്വൽ പ്രോപ്പർട്ടി ഓർഗനൈസേഷന്റെ (WIPO) 2025-ലെ ഗ്ലോബൽ ഇന്നൊവേഷൻ ഇൻഡക്സ് പ്രകാരം, വിലയിരുത്തപ്പെട്ട 139 രാജ്യങ്ങളിൽ ഖത്തർ 48-ാം സ്ഥാനം നേടി. 2020-ൽ 70-ാം സ്ഥാനത്തായിരുന്ന ഖത്തർ അഞ്ച് വർഷം കൊണ്ട് കൈവരിച്ച ഈ മുന്നേറ്റം ആഗോള ശ്രദ്ധ നേടുകയാണ്. വടക്കേ ആഫ്രിക്കൻ-പശ്ചിമേഷ്യൻ മേഖലയിലെ 18 രാജ്യങ്ങളിൽ ആറാം സ്ഥാനത്തും, ഉയർന്ന വരുമാനമുള്ള ലോക രാജ്യങ്ങളിൽ 42-ാം സ്ഥാനത്തുമാണ് നിലവിൽ ഖത്തർ.ശക്തമായ ഭരണസംവിധാനങ്ങൾ, പൊതു അടിസ്ഥാന സൗകര്യങ്ങൾ, മൂലധന നിക്ഷേപം എന്നിവയുടെ കരുത്തിൽ ഇന്നൊവേഷൻ ഇൻപുട്ടുകളിൽ (Innovation Inputs) ഖത്തർ ലോകതലത്തിൽ 34-ാം സ്ഥാനത്താണ്. എന്നാൽ, ഈ സാങ്കേതിക സൗകര്യങ്ങളെ അന്താരാഷ്ട്ര പേറ്റന്റുകളായും ഉയർന്ന മൂല്യമുള്ള വ്യാപാരോത്പന്നങ്ങളായും മാറ്റുന്നതിൽ (Innovation Outputs) രാജ്യം 67-ാം സ്ഥാനത്താണ് നിൽക്കുന്നത്.
​ഇൻപുട്ടുകളും യഥാർത്ഥ സാമ്പത്തിക ഉൽപ്പാദനവും തമ്മിലുള്ള ഈ വിടവ് നികത്തുകയാണ് ഇനി പ്രധാന ലക്ഷ്യമെന്ന് പ്രമുഖ അക്കാദമിക് വിദഗ്ധൻ ഡോ. സ്വലാഹ് അഹമ്മദ് അൽ ഹബൂ ചൂണ്ടിക്കാട്ടുന്നു. "സാങ്കേതികവിദ്യ കേവലം ഉപയോഗിക്കുന്നതിൽ നിന്ന് നിർമ്മാണത്തിലേക്കും, അതിലൂടെ ആഗോള പേറ്റന്റുകളും സോഫ്റ്റ്‌വെയറുകളും വികസിപ്പിക്കുന്ന തലത്തിലേക്കും മാറുമ്പോഴാണ് ഡിജിറ്റൽ പരിവർത്തനം പൂർണ്ണമാകുന്നത്," അദ്ദേഹം വ്യക്തമാക്കി. സർവ്വകലാശാലകളും വ്യവസായ മേഖലയും തമ്മിലുള്ള ഗവേഷണ സഹകരണത്തിൽ (University-Industry Collaboration) ഖത്തർ ലോകതലത്തിൽ പത്താം സ്ഥാനത്തുണ്ടെന്നത് ഈ ലക്ഷ്യത്തിലേക്കുള്ള വഴി എളുപ്പമാക്കുന്നു.
ആഗോള അല്ലെങ്കിൽ പ്രാദേശിക സാമ്പത്തിക അനിശ്ചിതത്വങ്ങൾ നിലനിൽക്കുമ്പോഴും ഭരണനിർവ്വഹണവും വാണിജ്യ പ്രവർത്തനങ്ങളും തടസ്സമില്ലാതെ മുന്നോട്ട് കൊണ്ടുപോകാൻ ഖത്തറിന്റെ മികച്ച ഡിജിറ്റൽ സംവിധാനങ്ങൾക്ക് സാധിക്കുന്നുണ്ടെന്ന് ദോഹ ഇൻസ്റ്റിറ്റ്യൂട്ട് ഫോർ ഗ്രാജുവേറ്റ് സ്റ്റഡീസിലെ മീഡിയ ഡിപ്പാർട്ട്‌മെന്റ് സീനിയർ ഹെഡ് ഡോ. ഖാലിദ് വലീദ് മഹ്മൂദ് പറഞ്ഞു. ക്ലൗഡ് അധിഷ്ഠിത സേവനങ്ങളും ഏകീകൃത ഡിജിറ്റൽ പോർട്ടലുകളും സേവനങ്ങൾ എളുപ്പമാക്കുന്നതിനൊപ്പം ഇ-കോമേഴ്‌സ്, ആർട്ടിഫിഷ്യൽ ഇന്റലിജൻസ്, ഡിജിറ്റൽ ഫിനാൻഷ്യൽ സേവനങ്ങൾ എന്നിവയിൽ പുതിയ അവസരങ്ങൾ തുറന്നിടുകയും ചെയ്യുന്നു.
​2020 മുതൽ കൈവരിച്ച ഈ ഘടനാപരമായ പുരോഗതി, വരും ദശകത്തിൽ വിജ്ഞാന അധിഷ്ഠിത സമ്പദ്‌വ്യവസ്ഥ കെട്ടിപ്പടുക്കുന്നതിൽ ഖത്തറിന് കരുത്താകും.